Mae Paul Evans yn Brif Swyddog Gweithredol yn Box UK, sef cwmni digidol enwog sy’n arbenigo mewn ymgynghoriadau meddalwedd, datblygu a phrofiad defnyddiwr. Mae Paul yn edrych ar ddylanwad Cenhedlaeth Z ar arferion busnes, ac mae’n pwysleisio’r manteision sy’n deillio o groesawu gweithlu mwy amrywiol.

Mae profiad Paul yn y diwydiant technoleg wedi mynd ag ef ledled y byd, o Boston i Dde Affrica, ac mae bellach wedi mynd yn ôl i’w wreiddiau Cymreig yng Nghaerdydd, lle mae’n arwain tîm o arloeswyr digidol. Mae Paul yn egluro:

“Mae gen i safbwynt eithaf cytbwys gan fy mod i wedi gweithio fel cyflenwr ac fel gwerthwr. Yn Box UK, rydym ni’n canolbwyntio ar ochr y gwerthwr, yn darparu atebion a gwasanaethau digidol i gleientiaid.”

Fel Prif Swyddog Gweithredol, mae rhan o’i strategaeth fusnes yn tynnu sylw at bwysigrwydd cofleidio amrywiaeth a chreu amgylchedd gwaith cynhwysol.

Mae Paul yn dweud, “Un o’n nodau hollbwysig ni yw cyflogi a chadw’r dalent orau, a daw’r dalent orau o bob cefndir. Pobl yw sylfaen Box UK, felly mae cofleidio diwylliant cynhwysol yn ein galluogi i ddenu’r dalent orau.

“Mewn busnes fel ni lle mae atebion arloesol yn hollbwysig, mae manteisio i’r eithaf ar amrywiaeth eang o safbwyntiau gweithwyr yn golygu ein bod yn gallu herio syniadau ein gilydd i ddod o hyd i’r atebion gorau ac osgoi dull un dimensiwn.”

Fodd bynnag, fel mae Paul yn ei ddweud, mae angen i’r uchelgais i feithrin gweithlu cynhwysol fod yn ddeublyg. Fel mae’n egluro,

“Er bod denu talent amrywiol yn bwysig, os nad ydym hefyd yn canolbwyntio ar gynnal diwylliant cynhwysol, ni fyddwn yn cadw’r bobl hynny. Mae’n bwysig bod ein gweithwyr a’n gwerthoedd yn cyd-fynd â’i gilydd, a bod ein gweithwyr yn teimlo eu bod yn cael eu parchu ac yn cael eu cefnogi i allu gwneud eu gwaith yn effeithiol.

“Mae creu’r diwylliant iawn yn golygu bod ein gweithwyr yn dod â’r fersiwn gorau o’u hunain i’r gwaith, ac mae hyn, yn ei dro, yn darparu’r gwasanaethau gorau i’n cleientiaid.”

Mae Box UK yn gweithio tuag at ddiwylliant mwy cynhwysol drwy wahanol ddulliau. Mae Paul yn disgrifio rhai o’r camau maen nhw’n eu cymryd i chwalu rhwystrau i gyflogaeth:

“Mae defnyddio iaith niwtral o ran rhywedd yn ein proffiliau swyddi, cael paneli recriwtio amrywiol, a chael ein recriwtwyr i fynd drwy hyfforddiant rhagfarn ddiarwybod yn rhai o’r ffyrdd y gallwn helpu i ddenu talent newydd ac amrywiol.”

Mae Box UK hefyd yn cymryd rhan mewn nifer o weithgareddau sydd ar wahân i’w gweithrediadau busnes o ddydd i ddydd.

Dywedodd Paul, “Rydym ni’n cymryd rhan mewn digwyddiadau yn y diwydiant fel Wythnos Tech Cymru, sy’n canolbwyntio ar weithwyr, recriwtio, amrywiaeth a chynhwysiant yn ogystal â gwybodaeth am y diwydiant. Fe wnaeth un o'n gweithwyr siarad am ei phrofiad o ADHD, a sut mae hyn yn effeithio ar ei gwaith. Fe wnes i gymryd rhan hefyd mewn sgwrs ar wahân yn mynd i'r afael ag iechyd meddwl dynion a'i arwyddocâd mewn amgylchedd busnes. Rydym ni’n annog ein tîm i gymryd rhan mewn sgyrsiau a digwyddiadau fel hyn er mwyn cyfrannu at gynnydd yn ein diwydiant.”

Mae Paul hefyd yn trafod digwyddiadau mewnol Box UK, sef sesiynau sy’n canolbwyntio ar bynciau penodol, lle mae gweithwyr yn cael cyfle i rannu gwybodaeth am eu profiadau eu hunain. Mae Paul yn dweud:

“Mae un o’n rheolwyr prosiect sy’n hollol fyddar wedi gweithio gyda ni i ddarparu sesiynau sy’n addysgu ein cydweithwyr am ei phrofiad yn y gweithle, ac yn rhoi cyngor ar sut gallwn ni weithio gyda’n gilydd i liniaru unrhyw rwystrau yn y gwaith. Rydym ni eisiau parhau i annog amgylchedd lle mae unigolion o gefndiroedd amrywiol yn teimlo eu bod wedi’u grymuso i fynegi eu hunain yn y gweithle. ”

Mae canolbwyntio ar reoli'r amgylchedd cynhwysol hwnnw wedi bod yn amcan busnes strategol ar gyfer Box UK, ac mae wedi cael sylw pellach yn ystod y blynyddoedd diwethaf o ganlyniad i fewnlifiad o Genhedlaeth Z yn ymuno â’r gweithlu, a’u dylanwad ar werthoedd craidd.

Mae Paul yn egluro, “Rwy’n gweld bod gan Genhedlaeth Z fwy o awydd i ymgysylltu â phwrpas nag unrhyw ddemograffig arall, ac mae pwy ydyn ni a beth rydym yn ei wneud yn bwysig iddyn nhw, yn enwedig o ran stiwardiaeth gorfforaethol.

“Mae’r busnes yn croesawu rhoi mwy o bwyslais ar amrywiaeth a chynhwysiant, lleihau ein hôl troed carbon, cymryd rhan mewn mentrau elusennol, a chroesawu gwerthoedd eraill sy’n diffinio’r genhedlaeth hon. Mae’r meysydd ffocws hyn yn ein helpu i wella’n barhaus fel busnes.

“O fewn y diwydiant technoleg yn benodol, mae cynnwys Cenhedlaeth Z yn y gweithlu wedi cyflwyno hyfedredd digidol sy’n ein galluogi i archwilio posibiliadau newydd fel cwmni. Mae hyn hefyd yn cyflwyno safbwyntiau newydd, gan hwyluso parhad dulliau arloesol o ymdrin â’n busnes, rhywbeth a allai ddylanwadu ar ein cleientiaid yn ei dro.

Mae Paul yn tynnu sylw at y polisïau sydd wedi esblygu o roi mwy o bwyslais ar werthoedd corfforaethol. Mae’n egluro bod,

“trefniadau gweithio hyblyg” wedi ein helpu ni i gyd i gael gwell cydbwysedd rhwng bywyd a gwaith, wedi ein galluogi i ddeall anghenion niferus ein gweithlu amrywiol, ac yn y pen draw wedi cyfrannu at lesiant gweithwyr a chynhyrchiant yn gyffredinol.

“Mae cyflwyno arloesedd a gwerthoedd newydd, ynghyd ag arbenigedd ein tîm, yn creu fformiwla wych ar gyfer llwyddiant ein busnes.

Wrth edrych i’r dyfodol, mae Box UK wedi ymrwymo i ddysgu a datblygu yn fewnol ac yn allanol, er mwyn cynnal ei ymrwymiad i amrywiaeth a chynhwysiant.

Mae Paul yn dweud: “Ar hyn o bryd, rydym ni’n gweithio gyda sefydliadau addysg ac yn buddsoddi ynddynt i gael dylanwad cadarnhaol ar y gronfa dalent, a sicrhau bod swyddi yn ein diwydiant yn apelio at bawb. Yn y cyd-destun hwn, mae ein nodau yn cynnwys sicrhau bod y dalent sy’n ymuno â’n busnes yn amrywiol, gyda’r gobaith y bydd hyn hefyd yn arwain at y gallu i gysylltu â chleientiaid ehangach sy’n gallu uniaethu’n well â ni.

Mae Paul yn cydnabod bod, “bob amser ffyrdd o wella ein hymrwymiad i amrywiaeth a chynhwysiant, ac rydw i’n bendant yn credu bod mwy y gallwn ni ei wneud. Mae’n ymwneud â pharodrwydd cyfunol i esblygu, gan roi polisïau ar waith, ond yna barhau i ailwerthuso a newid y mentrau hyn wrth i anghenion y gweithlu newid hefyd.”

“Byddwn yn argymell bod busnesau eraill yn blaenoriaethu amrywiaeth a chynhwysiant fel hanfod busnes strategol, gan arwain drwy osod esiampl i eraill yn eich diwydiant. Mae dangos angerdd ac ymrwymiad i ffurfioli’r gwerthoedd hyn yn eich gweithrediadau yn denu talent amrywiol yn ogystal â’r sgiliau mwyaf gwerthfawr.”

Fel rhan o gefnogaeth Llywodraeth Cymru i gyflogwyr, mae Recriwtio a Hyfforddi Busnes Cymru yn darparu cymorth cynhwysfawr i fynd i’r afael a sgiliau, hyfforddiant ac anghenion recriwtio busnesau, gan gynnwys amrywiaeth o raglenni sydd â’r nod o helpu cyflogwyr i gael gafael ar gronfa eang ac amrywiol o dalent, gan gynnwys y bobl sy’n cael eu cefnogi gan y Warant i Bobl Ifanc. Mae ei hymgyrch, Yn Gefn i Chi, yn helpu i godi ymwybyddiaeth o’r amrywiaeth o gymorth sydd ar gael i gyflogwyr i’w helpu i gyflawni eu nodau busnes.

Am ragor o wybodaeth, chwiliwch 'Busnes Cymru: Yn Gefn i Chi,' ffoniwch 03000 6 03000, neu ewch i https://businesswales.gov.wales/skillsgateway/cy/yn-gefn-i-chi