Mae’r cwmni maeth chwaraeon, Natural Ambition, wedi lansio ei gynhyrchion cyntaf mewn ymateb i ymdrechion ei sylfaenydd i ganfod cynhyrchion chwaraeon naturiol addas.

Fel athletwr brwd sy’n wynebu cymhlethdodau ychwanegol Diabetes Math 1, mae Paul McLoughlin yn gorfod teilwra’r hyn mae’n ei fwyta i roi mwy o ddygnwch iddo ac i reoli ei gyflwr.

Felly, am ei fod yn deall yn glir beth sy’n addas i’w gorff, ac fel dyn sy’n gwneud llawer o chwaraeon, roedd eisiau cynnyrch naturiol a fyddai’n helpu ei hyfforddiant a’i adferiad.

Roedd yn teimlo’n rhwystredig ynghylch y prinder ychwanegion a diodydd maeth chwaraeon organig addas, felly penderfynodd ddatblygu ei gynhyrchion ei hun – ac yn y broses creodd Natural Ambition, yn Wrecsam, Gogledd Cymru.

“Rwyf wedi cymryd rhan mewn chwaraeon erioed gan gynnwys cystadlaethau rhedeg, beicio oddi ar y ffordd a CrossFit, ond doeddwn i ddim yn gallu cymryd llawer o ychwanegion. Roeddwn i eisiau rhywbeth pur a naturiol i wella fy mherfformiad athletaidd ac i helpu i reoli fy nghyflwr. Rwy’n gwybod pa fwydydd i’w defnyddio i gael gwahanol faetholion sydd o fudd i wahanol agweddau o ddatblygiad athletaidd, p’un a ydyw i ehangu a thrwsio cyhyrau, i hydradu, i ennill egni neu i wella. Am fod gen i brofiad busnes a gwybodaeth am faeth, penderfynais ddatblygu fy mrand fy hun o gynhyrchion, Natural Ambition.”

Ychwanegodd Paul,

“Nid cynhyrchion diabetig mo’r rhain, ond cynhyrchion a ddatblygwyd i athletwyr a phobl gyffredin sy’n mwynhau chwaraeon.”

Mae Natural Ambition wedi lansio dau gynnyrch: Protein Maidd Organig gyda Cacao Pur, a Phowdr Dŵr Cnau Coco Organig gydag Oren. Maent ar gael mewn tiwbiau 750g a 340g yn y drefn honno.

Am eu bod wedi’u hardystio’n organig, maent yn gynhyrchion premiwm ac maent ar gael drwy wefan Natural Ambition. Cânt hefyd eu gwerthu mewn nifer gynyddol o gampfeydd CrossFit a chan fanwerthwyr llai, a byddant ar gael drwy Amazon cyn hir.

Maent yn cynnwys cyfuniadau o gynhwysion syml a naturiol: maidd, cacao a siwgr cnau coco, hefyd ddŵr cnau coco, siwgr cansen a thapioca decstrin - ffeibr gwych sy’n helpu i ddarparu maetholion yn llawer mwy effeithlon yn y corff.

Meddai Paul,

“Cafodd Natural Ambition ei ddatblygu fel maeth chwaraeon organig pur ar gyfer magu cryfder, hyfforddi a gwella gan fod mor gynaliadwy ag sy’n bosib ac mor ymwybodol ag y bo modd o’r amgylchedd.

“Mae ein cenhadaeth yn syml: cefnogi dull egnïol o fyw gyda maeth chwaraeon iach a gonest. Dim cynhwysion cudd, dim blendiau perchnogol, a dim byd artiffisial. Dim ond cynhwysion organig, naturiol sy’n darparu buddion go iawn i’ch perfformiad.

Mae’r powdr dŵr cnau coco organig sydd wedi’i ardystio gan y Gymdeithas Fegan yn deillio o gnau coco organig gwyrdd ifanc – sy’n cynnwys lefel uchel o electrolytau naturiol, potasiwm, sodiwm, calsiwm a magnesiwm. Cafodd y cynnyrch yma ei lunio i hydradu, i roi ynni ac i helpu gyda gwella, a gallwch ei ddefnyddio cyn gwneud sesiwn hyfforddi, ac hefyd ar gyfer chwaraeon dycnwch ac mae i’w weld yn fuddiol iawn i bobl sy’n cystadlu mewn triathlonau a chystadlaethau’r dyn haearn.

Mae Protein Maidd Organig y cwmni’n cynnwys cacao organig crai sy’n gyfoethog â gwrthocsidyddion. Mae pob math o elfennau buddiol mewn cacao organig, sy’n cynnwys 40 gwaith y gwrthocsidyddion sydd mewn llus ac sy’n ffynhonnell o haearn a magnesiwm. Mae hwn yn ddelfrydol i adeiladu, adfer a thrwsio cyhyrau.

Rhan bwysig o ethos brand Natural Ambition yw cynaliadwyedd, ac mae ei holl ddeunydd pacio’n ailgylchadwy. Yn ogystal, mae’r cwmni’n osgoi’r llwyau plastig sydd fel arfer yn dod gyda chynhyrchion o’r fath. Yn lle hynny mae cwsmeriaid yn defnyddio llwy fwrdd, llwy de neu glorian.

I ledaenu’r neges hon am faeth naturiol, mae Paul wedi sicrhau cefnogaeth llysgenhadon brand – y Pencampwr Byd mewn triathleteg Neil Eddy, a’r pencampwr Cross Fit Savannah Sullivan.

Mae’r ddau’n athletwyr amatur sydd ar y brig yn eu chwaraeon, ac mae Paul yn dweud bod hyn yn dangos bod cynhyrchion Natural Ambition i ‘bobl pob dydd sydd hefyd yn cystadlu’.

Mae Paul, sydd â chefndir mewn Rheoli Cynhyrchion, marchnata digidol Strategaeth Brand a chynnal asiantaeth fechan, wedi derbyn arweiniad a chymorth yn ei amcanion busnes gan Cywain – prosiect a ddarperir gan Menter a Busnes sy’n cefnogi datblygiad busnesau sy’n anelu at dyfiant yn y sector bwyd a diod yng Nghymru.

Meddai,

“Mae gen i flynyddoedd lawer o brofiad busnes ond nid cymaint felly o fewn y sector bwyd a diod. Mae Cywain wedi bod yn drysorfa ragorol o wybodaeth ac maent yn darparu’r lefel gywir o gefnogaeth sydd ei hangen yn dibynnu ar ba gam y mae eich busnes. Maent yn cynnig cyfleoedd gwych i weithio gyda mentor ac maent hefyd yn helpu i baratoi ar gyfer cyfarfod prynwyr.”

Meddai Swyddog Datblygiad Cywain, Llior Radford,

“Mae Paul wedi gorfod gweithio’n galed iawn i baratoi ei lwybr fel brand diodydd protein cychwynnol, mae’n sector anodd torri i mewn iddo, ond mae ei gynhyrchion yn arloesol ac mae’n amlwg y bydd Paul yn cadw ei ffocws ar yrru a datblygu hyn ymhellach.”

Mae Natural Ambition wedi derbyn cymorth hefyd gan Gronfa Fenthyciadau Micro-fusnesau Cymru sy’n cael ei reoli gan Fanc Datblygu Cymru ar ran Llywodraeth Cymru, a chymerodd ran yn y digwyddiad masnach arddangos Blas Cymru yng Nghasnewydd yn diweddar.