Mae cyfres o fapiau newydd i ymwelwyr â darluniau wedi'u cynhyrchu yn rhan o Wythnos Twristiaeth Cymru sy’n cael ei chynnal rhwng 15-21 Mai.

Mae’r pum map yn canolbwyntio ar wahanol ardaloedd ac yn cynnwys map trosolwg, lleoedd i ymweld â nhw, cerdded, beicio a map yn tynnu sylw at Sir Ddinbych yng nghyswllt y rhanbarth ehangach a’r prif ganolfannau cludiant.

Cafodd y mapiau eu cynhyrchu gan y darlunydd, David Goodman, a lluniwyd nhw i gyd â llaw. Mae pob un yn cynnwys tirweddau Sir Ddinbych, llwybrau cludiant cyhoeddus trenau a bysiau, trefi a phentrefi yn ogystal ag amwynderau ymwelwyr fel llyfrgelloedd, canolfannau hamdden, cyrsiau golff, theatrau, sinemâu, amgueddfeydd a chanolfannau croeso.

Dywedodd David:

“Mae wedi cymryd bron i flwyddyn i ni drosi’r wybodaeth i gyd i gyfres o fapiau a fydd, gobeithio, yn fan cychwyn gwych i unrhyw un sydd am ymweld â Sir Ddinbych neu grwydro Sir Ddinbych ymhellach. Mae’n ardal yr wyf i wedi dod i’w hadnabod yn dda iawn dros y blynyddoedd, ac rwy’n gobeithio y bydd y mapiau’n ennyn cymaint o ddiddordeb a llawenydd ag y gwnaethon nhw i mi wrth eu creu nhw.”

Caiff Wythnos Twristiaeth Cymru ei chynnal ym mis Mai bob blwyddyn i godi proffil y diwydiant twristiaeth yng Nghymru. Mae pwysigrwydd economaidd a chymdeithasol twristiaeth ar gynnydd, ac mae’n un o’r ffactorau mwyaf sy’n cyfrannu at swyddi lleol, busnesau lleol a’r economi leol.

Dywedodd y Cynghorydd Win Mullen-James, Aelod Arweiniol Datblygu Lleol a Chynllunio’r Cabinet:

“Mae twristiaeth yn rhan hanfodol o economi Sir Ddinbych ac mae’r effaith economaidd dros £432 miliwn, a bu dros 4 miliwn o ymweliadau â’r sir. Mae’r buddsoddi parhaus yn ardaloedd gwledig Sir Ddinbych a’i harfordir i wella’r cynnig i ymwelwyr yn galonogol iawn i sicrhau twf parhaus yn y dyfodol.”

Bydd agor Gorsaf Reilffordd Corwen yn ychwanegiad cyffrous i’r cynnig twristiaeth ar ôl cwblhau canopi’r platfform rheilffordd yng Ngorsaf Corwen yn llwyddiannus yn rhan o Gronfa Ffyniant Bro Cysylltedd Corwen - Porth Gorllewinol Newydd a Gwell i Ddyffryn Dyfrdwy a Safle Treftadaeth y Byd. Mae'r orsaf newydd yn ffrwyth llafur nifer o flynyddoedd o waith caled gan staff a thîm ymroddedig o wirfoddolwyr Rheilffordd Llangollen. Bydd 3 a 4 Mehefin yn cynnwys digwyddiad gala deuddydd pryd y bydd amserlen gyhoeddus lawn yn gweithredu gwasanaeth tri thrên yn cynnwys trenau stêm, trenau disel a cheir rheilffordd, a bydd pob trên yn gwneud dwy siwrnai ddwyffordd i Gorwen bob dydd. Bydd cymdeithas rheilffordd fodel Lerpwl yn arddangos cynllun â’r enw ‘Corwen’ yn y ganolfan gymunedol ac mae model wrth raddfa 4mm o rannau o Reilffordd Llangollen yn yr amgueddfa.

Mae gwaith arfordirol i wella profiad ymwelwyr hefyd wedi dechrau yn y Rhyl; nid yn unig i amddiffyn y dref rhag llifogydd ond hefyd i uwchraddio ac ehangu'r promenâd ar gyfer trigolion ac ymwelwyr fel ei gilydd. Mae rhai rhannau o’r promenâd ar gau, ond mae mannau mynediad eraill i’r traeth ar gael ac mae arwyddion yn dangos hyn yn glir. Bydd pob busnes ac atyniad i ymwelwyr ar agor fel arfer hefyd. Bydd beicwyr hefyd yn gallu dilyn llwybr ag arwyddion clir. Mae'r gwaith diweddaraf yn rhan o fuddsoddiad o £65 miliwn yn y dref yn cynnwys harbwr newydd, Parc Dŵr SC2, Theatr y Pafiliwn sydd newydd ei hadnewyddu a Bwyty 1891 yn ogystal â chwmnïau cadwyn cenedlaethol sydd wedi adeiladu gwestai newydd.

Os ydych chi’n chwilio am syniadau ac ysbrydoliaeth o leoedd i ymweld â nhw’r haf hwn, cymerwch olwg ar lyfryn newydd Darganfod Sir Ddinbych, taflenni llwybrau tref wedi’u diweddaru neu galwch heibio i Ganolfannau Croeso y Rhyl neu Langollen. Gellir cael rhagor o wybodaeth a dod o hyd i’r mapiau newydd i ymwelwyr ar wefan Gogledd Ddwyrain Cymru – www.gogleddddwyraincymru.cymru