Mae tref Aberystwyth yn elwa o gynllun Sgiliau Newydd Dechrau Newydd, a ariennir gan Lywodraeth y DU drwy’r Gronfa Adfywio Cymunedol a arweinir gan Gyngor Sir Ceredigion, ac a ddarperir gan Fenter Antur Cymru.

Ymysg y rhai sydd wedi manteisio ar adnoddau ariannol a gweinyddol y cynllun yw Pawel Banaszynski a agorodd ei fenter gyntaf – Y Gornel Café – yn y dre bythefnos yn ôl.

Yn gyn-gogydd yn rhai o fwytai bwyd môr mwyaf blaenllaw yr ardal mae Pawel, sydd yn hannu o Wlad Pwyl, yn byw yng nghanolbarth Cymru ers 17 o flynyddoedd. Mae’n ddiolchgar iawn i Reolwr y Prosiect, Julie Morgan a thîm Sgiliau Newydd Dechrau Newydd am yr help a gafodd i gael mynediad at Grant Rhwystrau rhag Dechrau, Busnes Cymru yn ogystal â bod wrth law i gynnig arweiniad a chyngor.

“Fy mreuddwyd oedd i fod yn berchennog ar fusnes fy hun a phan ddaeth y lle hwn yn rhydd doedd dim angen meddwl ddwywaith”

meddai Pawel sy’n cael cefnogaeth gan ei wraig Anita a’i ddwy ferch, Marianna a Milena.

“Dwi wastad wedi bod yn rhy brysur neu heb ddigon o hyder i fentro cyn hyn, ond yn ystod y pandemig cefais gyfle i feddwl a phenderfynu mai dyma’r amser iawn i wireddu’r freuddwyd.

“Does gen i ddim profiad mewn materion busnes felly dwi’n ddiolchgar iawn i Julie, a’r rhaglen, am y wybodaeth a’r arbenigedd sydd wedi gwneud cryn wahaniaeth, yn arbennig o ran sicrhau’r grant i fedru prynu llestri, cyllyll a ffyrc a’r offer angenrheidiol.”

Ychwanegodd 

“Roedd medru agor y drysau o’r diwedd yn anhygoel.  Ry’ ni wedi cael ymateb mor bositif gan y gymuned leol a llawer o’m hen gwsmeriaid wedi galw heibio i ddweud helo!

Mae lle i eistedd i hyd at 40 o gwsmeriaid a bydd hyd yn oed fwy o le y tu allan yn ystod y Gwanwyn a’r Haf – mae hwn yn ddechrau ar daith ryfeddol.”

Un arall sydd wedi cofleidio’r cyfle a gynigir gan y cynllun yw Helen Vardy, perchennog Yoga Essentials, sydd wedi’i leoli yn y Gofod Masnachu dros dro ar gyfer busnesau moesegol newydd ar Heol y Porth Tywyll.

Mae Helen yn parhau i weithio’n rhan-amser ym maes gofal plant ac addysg – un-i-un gyda dysgwyr ifanc ag awtistiaeth – law-yn-llaw â rhedeg y busnes crefftau. Yn ystod y flwyddyn, mae wedi gweld y busnes yn tyfu, a hynny wedi iddi ei lansio yn dilyn damwain wrth farchogaeth yn ystod y pandemig.

Mae wedi ychwanegu dillad at yr offer yoga a chanhwyllau persawrus sydd ar gael ar ei stondin ac yn gobeithio agor ei siop ei hun yn Aberystwyth rhyw ddydd.

“Dwi wedi gwneud yoga ar hyd fy oes.  Mae wedi helpu fi yn bersonol yn enwedig ar ôl i fi dorri a dadleoli fy arddyrnau’n wael yn y ddamwain,”

meddai Helen.

“Dwi’n annibynnol iawn ond yn ystod y cyfnod yn dilyn y ddamwain o’n i’n dibynnu’n helaeth ar fy mhartner Paul, fy mab Josh ac eraill i wneud popeth drosof gan fod fy symudedd yn gyfyngedig. Felly, roedd myfyrio a yoga yn bwysig iawn yn ystod fy adferiad.

“O wneud hyn a chael cymaint o amser i feddwl fe’m gwnaeth yn benderfynol i fwrw ymlaen a chynnig yr holl bethau dwi’n eu caru fel syniad busnes.  Dwi mor falch fy mod i wedi cysylltu â’r cynllun Sgiliau Newydd Dechrau Newydd ac ymuno â’r gymuned gefnogol yn y Gofod Masnachu.

“Mae gen i ddyslecsia hefyd felly mae gallu siarad â nhw wyneb-yn-wyneb yn lot o help i fi.  Mae wedi rhoi hwb i’m hyder ac o ganlyniad, mae’r busnes yn tyfu a thyfu.”

Yn ôl Julie, mae’r ystod o arweiniad a gafodd Pawel a Helen yn danogs ehangder y gefnogaeth sydd ar gael trwy Antur Cymru.  Ychwanegodd

“Rwy’n hynod o falch i weld y ddau yn mynd o nerth i nerth.  Maent wedi gweithio mor galed ac wedi gwireddu eu breuddwydion.

Trwy’r Gofod Masnachu, ry’ ni wedi helpu nifer fawr o fusnesau sy’n dechrau yn ystod y flwyddyn ddiwethaf, a bydd rhagor i ddilyn.  Mae’n galonogol gweld yr effaith gadarnhaol sy’n deillio ohono ar gyfer y dyfodol ac ar yr economi yng Ngheredigion.”

Am ragor o wybodaeth ewch i’r wefan www.anturcymru.org.uk/entrepreneurship/new-skills-new-start neu ebostiwch [email protected].

Dilynwch Y Gornel Café ar y cyfryngau cymdeithasol ar @YGornel, a Yoga Essentials trwy’r wefan : www.yoga-essentials.co.uk