Mae siopwyr yn cael eu hannog i brynu eu bwyd môr ar gyfer y Nadolig gan gynhyrchwyr lleol sy’n mabwysiadu technegau pysgota cynaladwy y Nadolig hwn.

Mae diwydiant bwyd môr Cymru yn gartref i amrywiaeth o gynnyrch safonol o ansawdd uchel, a gall defnyddwyr ddangos eu cefnogaeth i’r diwydiant trwy ddewis prynu pysgod a physgod cregyn sy’n cael eu dal a’u prosesu gan fusnesau bwyd môr o Gymru. Ceir manylion cynhyrchwyr a chyflenwyr ar fap cynhyrchwyr bwyd Cywain.

Mae ymdrechion i ledaenu’r neges bwysigrwydd bwyta bwyd môr Cymreig yn cynyddu gan gyrff o fewn y diwydiant, ac ar flaen y gad o ran cefnogi'r diwydiant mae Clwstwr Bwyd Môr Cymru - prosiect a arweinir gan Cywain sy'n annog cydweithio ymhlith cwmnïau ac unigolion yn y diwydiant bwyd môr.

Mae’r Clwstwr Bwyd Môr wedi bod yn allweddol wrth sefydlu nifer o weithgareddau hyrwyddo ar gyfer y sector, gan gynnwys brandio a rhaglen gymorth 1-i-1 wedi’i theilwra, gan gynnig cyfleoedd i gynhyrchwyr i fasnachu mewn digwyddiadau megis Neuadd Fwyd Ffair Aeaf Frenhinol Cymru.

Mae yna hefyd weithgareddwch i gefnogi’r rhai sy’n cael eu bywoliaeth o’r môr ac arfordir Cymru a’r heriau o fod yn rhan o ddiwydiant heriol.

Wedi’i lansio ychydig dros flwyddyn yn ôl, mae grŵp Merched Mewn Pysgodfeydd Cymru (WIWF) ar flaen y gad o ran hyrwyddo pwysigrwydd bwyta bwyd môr cynaliadwy o Gymru, a’r rolau allweddol niferus y mae menywod yn eu chwarae yn y sector.

Wedi'i hwyluso gan y Clwstwr Bwyd Môr, sefydlwyd y grŵp fel cyfrwng i alluogi menywod o'r diwydiant pysgota i gwrdd, rhannu profiadau, a chodi ymwybyddiaeth o'u gwaith a'u bywydau o fewn fforwm diogel a chefnogol.

Mae'r grŵp nawr am ehangu ei aelodaeth ymhellach i annog mwy o ferched i ystyried dilyn gyrfa yn y diwydiant pysgota a chynyddu ymwybyddiaeth defnyddwyr o amrywiaeth bwyd môr Cymru. Gall unrhyw un sydd â diddordeb mewn ymuno fynegi hynny trwy gysylltu â Chlwstwr Bwyd Môr Cymru.

Dywedodd Carol Evans, aelod o’r grŵp, a oedd ei hun yn rhedeg busnes pysgota gyda’i gŵr ac sydd nawr yn gweithio gyda Chymdeithas Pysgotwyr Cymru,

“Mae’r diwydiant bwyd môr yng Nghymru wedi wynebu sawl her dros y flwyddyn ddiwethaf. Drwy’r cyfnod anodd hwn, mae cymuned Bwyd Môr Cymru wedi bod yn ddiolchgar am gefnogaeth barhaus Clwstwr Bwyd Môr Cymru, gan gynnwys y gwaith parhaus o fewn fforwm Merched Mewn Pysgodfeydd Cymru, sy’n caniatáu inni rannu profiadau.

“Mae'r Fforwm wedi, ac yn parhau i fod, yn gaffaeliad mawr i'w aelodau trwy fod yn fan diogel i rannu gwybodaeth a rhwydweithio. Rydym yn anelu at ddatblygu rhai ymgyrchoedd dros y flwyddyn i ddod i annog pobl i brynu bwyd môr o ffynonellau lleol a fydd yn cadw’r milltiroedd bwyd yn isel ac yn cefnogi’r economi leol, gydag amrywiaeth wych o bysgod a physgod cregyn, wedi’u cynaeafu’n gynaliadwy o foroedd Cymru, gan ddarparu ffynhonnell bwysig o brotein iach, carbon isel o ffynhonnell sy’n adnewyddu’n naturiol am genedlaethau i ddod.”

Mae bwyd môr Cymreig yn parhau i gael ei hyrwyddo ar lwyfannau gartref a byd eang, gan gynnwys digwyddiad yn masnach mwyaf y byd ar gyfer y sector - Seafood Expo Global 2022 yn Barcelona.

Yn cynnwys mwy na 2,000 o gwmnïau o dros 89 o wledydd ac yn denu dros 50,000 o gynrychiolwyr, mae’r digwyddiad yn Barcelona yn cael ei gydnabod fel y ‘lle i fod’ ar gyfer y diwydiant bwyd môr, ac mae’r digwyddiad yn denu cyflenwyr, prynwyr a gweithwyr proffesiynol bwyd môr o bob cornel o’r byd i chwilio am bopeth o fwyd môr i offer prosesu.

O dan nawdd Clwstwr Bwyd Môr Cymru ac ar ran Llywodraeth Cymru, cyflwynodd sawl cwmni bwyd môr o Gymru eu cynnyrch i gynulleidfa arbenigol heb ei hail. Tra bu'r cogydd, Harri Alun o Westy Carden Park yn Swydd Gaer yn paratoi samplau i ddarpar brynwyr eu blasu trwy gydol y digwyddiad.

I gyd-fynd â Seafood Expo Global 2023, bydd brand bwyd môr Cymreig holl-gynhwysol a ddyluniwyd gan Glwstwr Bwyd Môr Cymru ac sydd wedi’i anelu’n benodol at y farchnad fyd-eang ac allforio yn cael ei lansio.

Dywedodd Nia Griffith, Rheolwr Clwstwr Bwyd Môr Gogledd Cymru,

“Rydym yn gwybod fod bwyd môr Cymreig o’r safon uchaf, ac mae’n cael ei ddefnyddio gan rai o gogyddion gorau’r byd. Rydym eisiau cynyddu amlygrwydd bwyd môr o Gymru ar y llwyfan byd-eang trwy greu brand clir sy’n dynodi i bawb tarddiad y cynnyrch gwych hwn sydd wedi’i ddal yn gynaliadwy. Wrth wneud hynny, rydym yn gobeithio codi proffil bwyd môr Cymreig a dathlu’r holl arwyr bwyd môr sydd gennym yma yng Nghymru.”

Roedd mentrau hefyd yn cynnwys cinio dathlu bwyd môr Dydd Gŵyl Dewi. Wedi'i gynnal yn y gwesty bwtîc enwog yn Llundain, L'Oscar, roedd llu o gogyddion nodedig, awduron bwyd, a chynrychiolwyr o fwytai mawreddog, gan gynnwys The Dorchester Hotel, Chotto Matte, ac One Aldwych yn bresennol.

Cydlynwyd y digwyddiad gan The Chefs’ Forum, a chynorthwywyd gan fyfyrwyr arlwyo a lletygarwch a gymerodd ran yn sesiynau Academi Cogyddion Bwyd Môr Cymru gyda Chlwstwr Bwyd Môr Cymru.

I gyd-fynd â’r amrywiaeth o gynnyrch a arddangoswyd roedd cyfeiriadur – a gyhoeddwyd ar gyfer y digwyddiad – o fusnesau bwyd môr Cymreig sydd ar hyn o bryd yn cynnig gwasanaeth cludo a dosbarthu i fanwerthwyr, cyfanwerthwyr, bwytai a chwsmeriaid unigol unrhyw le yn y DU.

Gan edrych ymlaen at 2023, mae dyddiadur y Clwstwr Bwyd Môr eisoes yn llenwi â digwyddiadau a mentrau i hyrwyddo bwyd môr Cymreig.

Yn eu plith mae estyniad i gynllun llwyddiannus 'bandiau bodiau wedi'w brandio' ar gyfer cimychiaid, a ddatblygwyd yn dilyn ceisiadau gan bysgotwyr i helpu cimychiaid Cymru i sefyll allan o’r dorf.

Pan gaiff cimychiaid eu dal, gosodir bandiau rwber ar eu bodiau i'w hatal rhag brifo eu hunain a'r rhai sy'n eu trin. O dan y cynllun brandio, mae bandiau ar y cimychiaid sy'n nodi'n glir eu bod yn cael eu dal yn nyfroedd Cymru gan bysgotwyr o Gymru.

Yn fuan y flwyddyn nesaf, bydd cynllun yn cael ei lansio i gynnwys system dagio draenogod y môr Cymreig gyda gwefan ble mae manylion a phroffiliau'r pysgotwyr a ddaliodd y pysgod ac i ba borthladd ar gael.

Dywedodd Nia Griffith,

“Mae’r Clwstwr Bwyd Môr yn sicr mewn cyfnod prysur arall ar ddechrau 2023. Edrychwn ymlaen at rannu’r datblygiadau cyffrous hyn gyda’r diwydiant a defnyddwyr.”