Mae Tîm Twristiaeth Cyngor Sir Ddinbych wedi bod yn diweddaru eu cyfres o Lwybrau Tref, sy’n ceisio ysbrydoli ymwelwyr a phobl leol i archwilio trefi yn Sir Ddinbych.

Yn ddiweddar, mae llwybrau Rhuthun a Llangollen wedi’u diweddaru i amlygu newidiadau diweddar i’r trefi, gan gynnwys amlygu’r canolbwynt cymunedol newydd yn yr hen lys a’r warchodfa natur newydd yn Wenffrwd, Llangollen.

Llwybr Corwen yw’r Llwybr Tref nesaf i gael ei ddiweddaru er mwyn helpu i hyrwyddo’r platfform rheilffordd newydd ar gyfer Gorsaf Corwen, a gwaith gwych y gwirfoddolwyr yn Amgueddfa Corwen.

Yn ogystal â’r Llwybrau Tref ar-lein, mae’r tîm twristiaeth wedi cynhyrchu taith gerdded sain yn y Rhyl hefyd, â’r nod o ddenu cynulleidfa ehangach, annog balchder yn y dref, cynaliadwyedd a hyrwyddo lles trwy annog pobl i gerdded.

Tony o Ganolfan Groeso’r Rhyl yw’r prif siaradwr ar y llwybr, a bydd siaradwyr gwadd eraill hefyd. Mae’r llwybr sain yn cynnwys gwybodaeth am hanes y Rhyl ac mae ar gael i bobl wrando arno naill ai wrth gerdded, gartref neu yn unrhyw le arall.

Dywedodd y Cynghorydd Win Mullen James, yr Aelod Cabinet Arweiniol Datblygu Lleol a Chynllunio:

“Mae’r Llwybrau Tref yn ffordd wych o archwilio’r trefi gwych yn ein Sir oherwydd maen nhw wedi’u trefnu’n ofalus i ddangos yr ardaloedd gorau a darparu gwybodaeth ddiddorol i ymwelwyr a phobl leol.”

“Rydym mor ffodus i fyw mewn ardal sy’n darparu hanes cyfoethog a golygfeydd hardd ac mae hon yn ffordd wych o annog pobl i fynd allan a mwynhau’r awyr iach.”

“Rwy’n edrych ymlaen at weld pobl yn profi’r nodwedd sain newydd sy’n cael ei pheilota yn y Rhyl oherwydd rwy’n credu bydd yr ychwanegiad modern newydd hwn yn denu cynulleidfa ehangach o bobl i’r llwybrau.”

Mae’r daith gerdded Sain ar gael trwy www.izi.travel/ a chaiff ei hyrwyddo ar fyrddau’r llwybrau tref. Os bydd yn llwyddiannus, mae’r Cyngor yn gobeithio creu’r un llwybr sain ar gyfer trefi eraill Sir Ddinbych yn y dyfodol.