Mae’r becws arloesol Wilfreds Pies wedi sicrhau ei restriad aml-fanwerthwr hirdymor cyntaf gyda lansiad detholiad newydd o basteiod yn Asda wedi’u hysbrydoli gan ddiodydd alcoholig Cymreig.

Mae’r rhestriad yn gweld dau ddetholiad o gynnyrch Wilfreds o Abertawe yn ymddangos mewn dros 30 o siopau Asda, gydag ymateb cwsmeriaid hynod gadarnhaol.

Mae’r detholiadau’n cynnwys y bastai arobryn ‘Saucy Cow’ – a gafodd 1 seren yn ddiweddar yn y Great Taste Awards a gwobr arian yng Ngwobrau Pastai Prydain 2023 – a’r ‘Tipsy Chicken’ llawn blas.

Wedi’i wneud gyda Chig Eidion Cymru a Chwrw Gorslas Cwmni Bragu Morgannwg, mae pastai ‘Saucy Cow’ yn llawn blas. Yn y cyfamser, mae ‘Tipsy Chicken’ yn cynnwys brest cyw iâr suddlon wedi’i choginio’n ofalus mewn cennin hufennog a Seidr Taffy Apples.

Yn arloeswr blaenllaw yn y diwydiant pasteiod, mae Wilfreds yn crefftio ei basteiod gyda’r gofal mwyaf a sylw i fanylder, gan ddefnyddio cynhwysion premiwm a phecynnu cynaliadwy, sy’n adlewyrchu ymroddiad y cwmni i ansawdd a’r amgylchedd.

Mae tîm Wilfreds wedi gweithio’n ddiflino i ddatblygu ystod o gynhyrchion o ansawdd uchel ‘sy’n canolbwyntio ar Gymru’ sy’n darparu ar gyfer anghenion siopwyr Asda yn rhanbarthau De Cymru a De Orllewin Lloegr. Ar ôl ymchwil i’r farchnad gofalus, canfod cynhwysion Cymreig o safon a mireinio parhaus, crëwyd y cynhyrchion i fodloni'r ansawdd uchel y gofynnwyd amdano. Mae’r cwmni hefyd wedi cael cymorth gan Is-adran Fwyd Rhaglen Datblygu Masnach Llywodraeth Cymru.

Mae’r cydweithrediad newydd ag Asda – y manwerthwr cyntaf i gynnig y cynhyrchion hyn ar restriad hirdymor – wedi galluogi Wilfreds i gyrraedd cynulleidfa ehangach a gwneud eu cynnyrch yn hygyrch i fwy o gartrefi ledled Cymru a thu hwnt. Mae'r garreg filltir hon yn gam sylweddol ymlaen yn nhwf y cwmni ac yn ailddatgan ei ymrwymiad i sicrhau rhagoriaeth ym mhopeth a wnânt.

Dywedodd John McAughtrie, Cyfarwyddwr Gwerthiant Wilfreds Pies,

“Rydym wrth ein bodd gyda’r derbyniad cadarnhaol i’n cynnyrch yn Asda. Mae cefnogaeth Asda a’n cwsmeriaid ffyddlon wedi bod yn allweddol i sicrhau’r llwyddiant hwn, ac edrychwn ymlaen at adeiladu ar ein partneriaeth gydag Asda wrth i ni barhau i gyflwyno mwy o gynnyrch arloesol yn y dyfodol.”

I ddysgu mwy am ein cynnyrch neu i ddod o hyd i'r siop Asda agosaf lle maent ar gael, ewch i www.wilfredspies.com