Mae dau o frandiau cynnyrch llaeth organig mwyaf adnabyddus Cymru yn cyfuno i brosesu eu cyflenwad llaeth a’u profiad o’r farchnad i gynyddu busnes a lleihau eu hôl troed carbon.

Mae Calon Wen a Daioni Organic wedi cytuno i gynhyrchu a phrosesu eu cyflenwad llaeth ar y cyd, tra’n cadw eu brandiau a’u hunaniaethau ar wahân.

Bydd y cydweithio hwn yn galluogi’r busnesau i sicrhau cynnydd ac effeithlonrwydd ymysg cystadleuaeth gynyddol ar draws y gadwyn gyflenwi fyd eang.

Dywedodd Dai Miles, Rheolwr Gyfarwyddwr Calon Wen, fod uchelgais gref y ddau gwmni i dyfu yn golygu bod cydweithio ar rai gweithrediadau yn y farchnad heddiw yn gwneud synnwyr.

Gan nodi’r Arddangosfa Gulfood yn Dubai yn ddiweddar fel enghraifft, lle’r oedd cynnyrch Daioni i’w gweld ym mwth Calon Wen ar stondin Llywodraeth Cymru,

Dywedodd Mr Miles,

Mae dau ben mochyn yn well nag un, a chredwn fod modd manteisio ar fwy o gyfleoedd yn y farchnad.

Mae’r ddau gwmni yn aelodau o Glwstwr Bwyd Da Bwyd a Diod Cymru ac mae’n cydweithio ni yn enghraifft wych o fuddion y rhaglen Glwstwr.

Nid yw’r cwmnïau’n uno, mae gennym bortffolio brand ar wahân, ond drwy gydweithio, rydym yn gobeithio creu mwy o gyfleoedd i’r ddau gwmni.

Dywedodd, Laurence Harris, Sylfaenydd Daioni Organic,

Mae’r ddau gwmni wedi adnabod a pharchu ei gilydd a’u brandiau erioed. Mae’r ddau gwmni cynnyrch llaeth wedi eu hadeiladu ar egwyddorion organig cadarn, gyda pharch cynhenid at y tir a’r anifeiliaid yn ein gofal. Mae’n gwneud synnwyr inni gydweithio i ddod â’n cynnyrch i’r farchnad a bod o gymorth i’r naill a’r llall dyfu.

Mae Daioni Organic wedi adeiladu brand cydnabyddedig ac uchel ei barch yn rhanbarth Asia a'r Môr Tawel, gyda marchnadoedd yn y Dwyrain Canol hefyd. Byddwn yn gweithio gyda Calon Wen i ddatblygu ac ehangu’r marchnadoedd tramor ar gyfer y ddau gwmni.

Lansiwyd Calon Wen yn 2000, ac mae’n gwmni cydweithredol o 25 fferm organig teuluol ar draws Cymru, sydd wedi ei leoli yn Arberth. Mae’n cynhyrchu llaeth, caws a menyn sydd wedi ennill gwobrau, a gellir gweld cynnyrch Calon Wen gan nifer o fanwerthwyr ac allfeydd annibynnol ar draws Cymru yn ogystal ag ar lein. Mae cynnyrch y cwmni’n cael ei allforio i Japan a’r Dwyrain Canol hefyd - gan gynnwys yr Emiraethau Arabaidd Unedig.

Lansiwyd Daioni Organic, cynhyrchydd arall o Sir Benfro, yn 2003. Mae ei ystod o ddiodydd llaeth organig â gwahanol flasau wedi ennill sawl gwobr ac mae amrywiaeth y cynnyrch yn cynnwys llaeth hir oes a choffi Masnach Deg organig parod i’w yfed hefyd. Mae cynnyrch Daioni Organic yn cael ei werthu ledled y Deyrnas Unedig, yn ogystal â’i allforio ar draws y byd, a llaeth y cwmni oedd y llaeth organic cyntaf o Brydain i gael ei ardystio i’w werthu yn Tsieina.

Dywedodd Mr Miles na fydd y cydweithio yn effeithio ar frandiau unigol Calon Wen a Daioni na’u teyrngarwch presennol ond bydd o gymorth i gryfhau eu safle yn y farchnad.

Dywedodd Mr Miles,

Gyda chryfder y ddau fusnes wedi eu cyfuno ac ystod lawn o gynnyrch llaeth, rydym yn gobeithio bwrw ati’n syth i ennill marchnadoedd newydd.

Dywedodd Mr Harris,

Mae’n gyfnod cyffrous. Rydym yn gweld hyn fel y ffordd ymlaen i ddatblygu ein busnesau a sicrhau enillion uwch i ffermwyr organig. Fel busnesau eithaf bychan o fewn uchafiaeth gorfforaethol, rydym yn edrych ymlaen at gynyddu cynhyrchiant gan leihau costau, gwella effeithiolrwydd a lleihau ein hôl troed carbon.

Yn y pen draw, mae ffermio organig yn system gynhyrchu bwyd gynaliadwy. Ei dymuniad yw sicrhau bod y busnes o ddod â ffermio organig i’r farchnad mor gynaliadwy â phosib drwy’r synergeddau gorau posib rhwng Calon Wen a Daioni Organic.