Dangosodd cwmni teuluol bod ganddynt olygon clir yn ystod y pandemig ar ôl cynyddu trosiant a chyflogi staff newydd.

Wrth agosáu at 40 mlynedd mewn busnes, dywed Peninsula Home Improvements o Ynys Môn bod partneriaethau newydd a chreu portffolio amrywiol wedi cael effaith gadarnhaol ar dwf.

Dywedodd y cyfarwyddwr gwerthu Dylan Hulse, un o raddedigion y rhaglenni poblogaidd Arwain  Twf Busnes yn Ysgol Busnes Prifysgol Bangor, bod agwedd fwy adfyfyriol wedi chwarae rhan fawr yn y gwaith o ehangu’r busnes yng Ngaerwen sy’n un o brif gyflenwyr ffenestri, drysau ac heulfannau arbenigol y rhanbarth ac sydd wedi ennill gwobrau.

Wrth i brifysgolion Bangor a Metropolitan Caerdydd lansio eu hail gwrs Helpu i Dyfu, a gaiff ei ariannu 90% gan Lywodraeth y DU, anogodd eraill i ddilyn yn ôl ei draed a chofrestru’n fuan ar y cwrs.

Dywedodd Dylan, sy’n byw ym Menllech gyda’i wraig Natasha a’u dau o blant,

“Mae’r cwrs Arweinyddiaeth ION a gwblheais yn bendant wedi cael effaith arnaf yn bersonol ac yn broffesiynol, ac ar y cwmni trwy weithredu newid ac adnewyddu’r strategaeth.”

“Caniataodd hyn i mi bwyso a mesur fy ngyrfa yn ogystal â chyfeiriad a gweledigaeth ein tîm gweithgar, gan sicrhau bod popeth yn cyd-fynd.

“O ganlyniad, mae ein trosiant wedi cynyddu’n sylweddol yn yr ychydig flynyddoedd diwethaf trwy greu portffolio amrywiol o ran cynnyrch a gwasanaeth yn ogystal â meithrin partneriaethau brand unigryw o fewn y diwydiant, a gobeithio y bydd hynny’n parhau.”

Mae'r cwrs rheoli Helpu i Dyfu wedi'i anelu at fusnesau bach a chanolig a bydd yn dechrau ar 22 Medi.

Mae’r cwrs yn cynnwys 12 modiwl a gyflwynir ar sail hybrid gyda themâu yn cynnwys cyllid, marchnata a strategaeth, a bydd cyfranogwyr yn derbyn cynllun twf, 10 awr o fentora am ddim, dod yn rhan o grŵp cynghori a rhannu ymarfer gorau i helpu i ennill busnes newydd.

Mae Peninsula Home Improvements yn cyflogi 25 o staff ar yr ynys, ac mae’n un o gannoedd o sefydliadau yng Nghymru sydd â staff sy’n gyn-fyfyrwyr o’r Ysgol Busnes, ac mae Dylan – sydd wedi bod gyda Peninsula ers 2004 - wedi elwa o hyn.

Dywedodd,

“Penderfynais astudio’r cwrs gan fy mod yn meddwl bod datblygiad personol yn hanfodol bwysig mewn unrhyw faes.”

“Rwyf wedi gweld y gallwch ddysgu o'r cyrsiau hyn yn ogystal ag o’r bobl rydych yn cwrdd â nhw ar y cyrsiau sy'n gallu eich helpu mewn bywyd busnes a theuluol.  Mae dysgu sgiliau newydd ac yna gallu eu gweithredu yn rhywbeth rwyf wrth fy modd yn ei wneud.”

Ychwanegodd:

“Mae syniadau a damcaniaethau yn wych ond mae gallu eu cymhwyso yn y byd go iawn yn hollbwysig.  Mae i gyd yn ymwneud â'r ffordd rydych yn gweithredu.

“Byddwn yn argymell bod unrhyw un sy’n rhedeg busnes neu sydd mewn sefyllfa sy’n dylanwadu ar eraill i ddilyn y rhaglen hon – mae’r modiwlau, y tiwtoriaid a’r cyd-fyfyrwyr yn ei gwneud yn benderfyniad hawdd.”

Gwnaeth Lorraine Hopkins, Rheolwr y rhaglenni Arwain Twf Busnes, longyfarch Peninsula Home Improvements ar eu llwyddiant diweddar.

Dywedodd Lorraine,

“Mae'n wych clywed gan Dylan faint y mae ef a'r cwmni wedi elwa o fod yn rhan o'n rhaglen.”

“Gyda’r cwrs Helpu i Dyfu newydd yn ei le gallwn gynnig hyd yn oed mwy a chael effaith barhaus ar ddyfodol strategol ac ariannol busnesau bach a chanolig ar draws y rhanbarth.

“Rydym yn annog perchnogion a rheolwyr i gysylltu a dysgu mwy gan fod lleoedd yn llenwi’n gyflym.”

I gael rhagor o wybodaeth ac i gofrestru ar y cwrs Help i Dyfu, ewch i yma.

Ewch i www.peninsulawindows.co.uk i gael gwybod mwy am Peninsula Home Improvements.