Mae’r cwmni ynni adnewyddadwy Infinite wedi ennill y tendr i gyflenwi pŵer yn uniongyrchol i’r Bathdy Brenhinol. Bydd y prosiect yn dod ynghyd arbenigwyr ym maes ynni adnewyddadwy - datblygu, technegol a chyllid, i adeiladu canolfan ynni leol amldechnoleg ar y safle yn Llantrisant. Bydd y ganolfan yn ymgorffori fferm solar 2MW ar dir cyfagos y rhagwelir y bydd yn cynhyrchu 2.4GWh bob blwyddyn i’r Bathdy Brenhinol. Gwynt, Gwres a Phŵer Cyfunedig sy’n barod am hydrogen a storio batris yw’r cymysgedd o dechnolegau a ddefnyddir.

Meddai Andrew Crossman, Cyfarwyddwr Infinite:

“Mae’r ganolfan ynni yn y Bathdy Brenhinol yn brosiect aruthrol o gyffrous ac arloesol sy’n gwthio ffiniau cynhyrchu ynni datganoledig a dosbarthu micro-grid. Fel safle gweithgynhyrchu mawr, y Bathdy Brenhinol yw’r safle ymgeisiol perffaith ar gyfer canolfan ynni integredig. Bydd cynhyrchu ynni o dechnolegau carbon isel ac adnewyddadwy, wedi’i ddosbarthu drwy ficro-grid clyfar, yn hwb enfawr i strategaeth lleihau carbon y Bathdy Brenhinol.”

Meddai Sarah Bradley, Cyfarwyddwr AD, Diogelwch a’r Amgylchedd yn y Bathdy Brenhinol:

“Rydym bob amser yn chwilio am ffyrdd o fod yn fusnes cynaliadwy a lleihau ein heffaith carbon a bod yn gymydog ystyriol i’n hamgylchedd. Yn 2018, gwnaethom ddadorchuddio tyrbin gwynt ar y safle, ac mae’n bleser gennym weithio gydag Infinite i adeiladu ar ein hymrwymiad i ynni adnewyddadwy.”

Bydd y tyrbin gwynt ‘Daffodil’ 850kW Vestas a gafodd ei ddylunio, ei gyflenwi a’i adeiladu gan Infinite yn cael ei integreiddio â system cynhyrchu LEC. Mae eisoes yn cyflenwi hyd at 10 y cant o alw ynni’r Bathdy Brenhinol.

Bydd y cynllun storio ynni mewn cynwysyddion, yn cynnwys system rheoli batris ADEPT â dau fath o fatri cemegol, wedi’i ddatblygu gan Infinite mewn partneriaeth â GS Yuasa a Phrifysgol Sheffield a bydd yn cynnig datrysiad pŵer newydd sy’n cyfuno ymateb cyflym y batri lithiwm â gwytnwch asid plwm.

Mae’r ganolfan, y disgwylir iddi fod yn weithredol erbyn hydref 2022, yn rhan o’r prosiect Cynhyrchu, Storio, Defnyddio, Cyflenwi (GSCS) ac wedi’i ariannu gan Gronfa Datblygu Rhanbarthol Ewrop (ERDF) ac Albion Community Power. Bydd yn arbed ar gostau ynni ac yn cynnig gostyngiad carbon.

Medd Marco Yu, Cyfarwyddwr Buddsoddi, Albion Community Power:

“Mae Albion wrth ei fodd ei fod yn dod â’i arbenigedd ynni lleol i alluogi’r prosiect hwn, y ‘cyntaf o’i fath’, ochr yn ochr â thîm Infinite a’r Bathdy Brenhinol. Mae’n arwydd pwysig o sut y gall y DU gyflawni allyriadau sero-net, democrateiddio’r system ynni a chefnogi cyflogaeth yn yr ardal. Mae’n gam cyffrous iawn ymlaen.”

Meddai Julie James, Gweinidog Newid Hinsawdd Llywodraeth Cymru:

“Mae’r prosiect newydd hwn yn y Bathdy Brenhinol, ynghyd ag agor y ganolfan ynni’n ddiweddar yng Nglynebwy a chynlluniau ynni lleol eraill a ariennir gan yr UE sydd yn yr arfaeth ar draws De a Gorllewin Cymru yn ddatblygiadau cyffrous ac yn gam pwysig ymlaen tuag at ein huchelgais, sef dyfodol carbon isel i Gymru. Byddant yn darparu ynni gwyrdd cost-effeithiol, dibynadwy i fusnesau a chymunedau lleol.”

Bydd Infinite yn sefydlu cronfa gymunedol leol a dosberthir canran o’r refeniw y mae Gwres a Phŵer Cyfunedig a’r fferm solar yn ei greu i elusennau lleol a grwpiau cymunedol y mae eu mentrau’n cyd-fynd â themâu’r Cronfeydd Strwythurol Ewropeaidd.