Heddiw, mae Young Enterprise, yr elusen addysg ariannol a menter genedlaethol, wedi lansio fersiynau Cymraeg o’i rhaglen addysg ariannol gynradd brif ffrwd fwyaf, sef Arwyr Arian.

I ddathlu Dydd Gŵyl Dewi, bydd yr adnoddau Cymraeg ar gael am ddim o 1 Mawrth 2023 ymlaen, ar wefan Arwyr Arian.

Mae Arwyr Aran, gan Young Money, a gefnogir gan HSBC UK, yn helpu pobl ifanc i ddysgu am arian yn yr ysgol a gartref, trwy amrywiaeth o adnoddau difyr a diddorol o ansawdd uchel. Mae’r rhain yn cynnwys llyfrau straeon, gemau a gweithgareddau ar gyfer ysgolion a gartref.

Mae’r adnoddau, a ddyluniwyd i’w defnyddio gan rieni, gofalwyr, athrawon ac addysgwyr eraill, yn dod ag addysg ariannol ar gyfer plant cynradd 3-11 oed i gynulleidfa ehangach fyth. Mae’r adnoddau Cymraeg yn helpu i ymestyn cyrhaeddiad y rhaglen, a wnaed yn fwy hygyrch yn flaenorol trwy lansio ystod lawn o adnoddau Anghenion Addysgol Arbennig ac Anabledd (AAAA) yn ddiweddar (gan gynnwys gweithgareddau wedi’u haddasu a’u harwain gan allu, ochr yn ochr â fersiynau o’r llyfrau straeon mewn braille, Iaith Arwyddion Prydain, print bras a llyfr llafar).

Mae’r gweithgareddau’n ymdrin ag amrywiaeth o bynciau, o ddysgu sut i wahaniaethu rhwng angen ac eisiau, i reoli cyllidebau, dysgu o ble mae arian yn dod, gwario a chynilo.

Mae’r adnoddau Cymraeg yn cynnwys:

• 5 e-lyfr (3x 3-7 oed, 2 x 7-11 oed)
• 28 o weithgareddau y gellir eu lawrlwytho (17 ar gyfer ysgolion a 12 i’w gwneud gartref)
• 12 o adnoddau ategol
• Canllaw i Rieni a Rhestr Termau i Gynorthwyo Athrawon

Dywedodd Sharon Davies, Prif Swyddog Gweithredol Young Enterprise: “Mae Arwyr Arian wedi cyrraedd dros 400,000 o bobl ifanc yn ystod y tair blynedd diwethaf. Bellach, trwy’r fersiwn Gymraeg, fe all gyrraedd cynulleidfa ehangach fyth. Mae’n un o’r prosiectau cyffrous rydyn ni’n eu lansio eleni i ddathlu ein 60^ain pen-blwydd.

“Mae Arwyr Arian wedi ymrwymo i roi’r offer y mae eu hangen ar blant i ddatblygu eu gallu ariannol wrth iddynt fynd yn hŷn. Mae ymchwil yn dangos, ar gyfartaledd, bod plant yn dechrau datblygu eu harferion ariannol pan fyddant yn saith oed. Po ieuengaf y gallwn ddechrau gwella llythrennedd ariannol plant, gorau oll.

“Yn Young Enterprise, rydym yn credu y dylai pob plentyn gael y cyfle i ddatblygu sgiliau rheoli arian ar gyfer y dyfodol. Mae addysg ariannol yn allweddol i ddatblygu gwybodaeth, sgiliau ac agweddau plant tuag at arian – a dwy o’r ffyrdd hawsaf o gyrraedd plant yw trwy athrawon a rhieni.”

Dywedodd Dyfrig Roberts, Cyfarwyddwr Lleol, Arfordir Gogledd Cymru o HSBC UK: “Rydym yn cefnogi Arwyr Arian oherwydd ein bod yn gwybod pa mor bwysig yw rôl rhieni ac athrawon wrth helpu plant i ddysgu am arian. Bydd cynnig adnoddau Arwyr Arian yn Gymraeg yn dod â’r rhaglen addysg ariannol i gynulleidfa newydd. Gall y pecyn o weithgareddau, llyfrau straeon ac arweiniad helpu pobl ifanc yng Nghymru i gyflawni dyfodol ariannol mwy llwyddiannus.”

Dywedodd Lorraine Dalton, Pennaeth Ysgol Bryn Gwalia, Yr Wyddgrug: “Mae defnyddio y llyfrau ac adnoddau ar-lein wedi bod yn ganolog i lwyddiant ein hysgol wrth gyflwyno Addysg Ariannol ar draws pob blwyddyn yn yr ysgol.  Mae'r gweithgareddau a'r storïau sydd, wedi'u cynllunio'n dda, yn ennill diddordeb y disgyblion ac yn ymgysyltu efor'r plentyn  i feddwl am bob agwedd o reoli arian.”

Mae Young Enterprise hefyd yn cynnig hyfforddiant athrawon achrededig AM DDIM, wedi’i ardystio gan DPP i ysgolion ac athrawon a mentora 1:1 wedi’i deilwra er mwyn rhoi’r hyder, y wybodaeth a’r sgiliau i athrawon fel y gallant ddatblygu arferion ariannol plant a’u hagweddau at arian.

Ynglŷn ag Young Enterprise

Elusen addysg ariannol a menter genedlaethol yw Young Enterprise sy’n ysgogi pobl ifanc i lwyddo mewn byd gwaith sy’n newid trwy roi’r sgiliau, y wybodaeth a’r hyder y mae arnynt eu hangen. Sefydlwyd Young Enterprise ym 1962, ac mae’n rhan o’r rhwydwaith byd-eang JA Worldwide, sy’n gweithredu mewn 120 o wledydd.

Credwn na ddylai unrhyw berson ifanc gael ei adael ar ôl. Ein gweledigaeth yw bod pob person ifanc yn cael y cyfle i ddysgu’r sgiliau hollbwysig y mae arnynt eu hangen i ennill arian a gofalu amdano, datblygu ffordd fentrus o feddwl a gwneud cyfraniad gwerthfawr at eu cymunedau a’r gymdeithas ehangach.

Ein cenhadaeth yw grymuso pobl ifanc i ddarganfod, datblygu a dathlu eu sgiliau a’u potensial.

I gael rhagor o wybodaeth am Young Enterprise a Young Money, ewch i www.young-enterprise.org.uk neu anfonwch neges e-bost at [email protected].