Mae Cyngor Sir Ddinbych ac undebau'r ffermwyr yn annog ffermwyr i ddilyn mesurau cadw pellter cymdeithasol pan fyddant yn mynd i farchnadoedd da byw ar draws y rhanbarth.

Mae adroddiadau wedi dod i law y Cyngor nad yw rhai ffermwyr yn cadw at fesurau cadw pellter cymdeithasol wrth fynd i farchnadoedd da byw.

Dywedodd y Cynghorydd Mark Young, Aelod Arweiniol y Cabinet ar gyfer Cymunedau Mwy Diogel y Cyngor:

“Rydym yn atgoffa ffermwyr o’r pwysigrwydd o gadw at fesurau cadw pellter cymdeithasol wrth fynd i farchnadoedd da byw a hefyd i arfer camau hylendid da.

“Yn ystod yr achosion cyfredol o Covid-19, mae’n hanfodol ymddwyn yn gyfrifol ac i ddilyn canllawiau er mwyn helpu i atal achosion lleol.

“Mae’r mwyafrif o ffermwyr yn dilyn canllawiau ac rydym yn diolch iddynt wrth i bob un ohonom gydweithio i leihau’r risg o’r coronafeirws yn lledaenu a chadw ein cymunedau yn ddiogel.

“Rydym wedi bod yn gweithio gyda marchnadoedd da byw, sydd wedi gweithio’n galed i sicrhau bod mesurau yn eu lle, i’w wneud mor hawdd â phosibl i ddilyn rheoliadau a chadw’n ddiogel.

“Byddem hefyd yn atgoffa pobl i ddilyn canllawiau Llywodraeth Cymru ac Iechyd Cyhoeddus Cymru, ac i hunan-ynysu os ydynt wedi bod mewn cyswllt ag achos neu achos a amheuir o goronafeirws.  Dylent hwythau hefyd gael prawf.”

Dywedodd Llywydd yr FUW, Glyn Roberts:

“Mae methu â chadw at y rheolau’n peryglu bywydau pobl, ac yn creu’r perygl o awdurdodau yn gorfod cau marchnadoedd ar adeg fasnachu hanfodol i’r diwydiant ffermio. Ni ellir caniatáu i hyn ddigwydd ac er budd ein diwydiant a lles y rhai hynny sy’n gweithio ynddo, byddwn yn annog pawb i ymddwyn yn gyfrifol ac i gadw at y rheolau.”

Dywedodd Ymgynghorydd Sir Clwyd NFU Cymru, Joe Mault:

“Nid yw’r bygythiad gan y Coronafeirws yng Nghymru wedi mynd. Rydym yn annog pob aelod o’r gymuned ffermio yn gryf, i barhau i ddilyn rheolau cadw pellter cymdeithasol yn drylwyr, boed a ydynt ar fferm, yn mynd i weld busnesau eraill neu'r farchnad arwerthiant.

“Mae’r fasnach yn ein marchnadoedd lleol yn hanfodol i’r cadwyni cyflenwi a chynhyrchiant a byddai unrhyw amhariad pellach ar hyn yn gallu cael effaith niweidiol ar y diwydiant ehangach. Mae’n bwysig cadw at ganllawiau’r llywodraeth, yn cynnwys mesurau cadw pellter cymdeithasol, er mwyn amddiffyn y rhai hynny sy’n bresennol a’n heconomi lleol.”

Gall unrhyw un yn y gymuned ffermio sydd eisiau mwy o wybodaeth am fesurau cadw’n ddiogel fynd ar dudalen we coronafeirws y Cyngor ar www.sirddinbych.gov.uk/coronafeirws neu wefan Llywodraeth Cymru.