North Wales Suppliers Must Be Visible in the Clean Energy Transition

Pan fydd sefydliad yng Ngogledd Cymru yn penderfynu buddsoddi mewn paneli solar, system storio ynni batris neu adeilad mwy ynni-effeithlon, rwyf am iddo allu dod o hyd i’r arbenigedd sydd ar gael yn agos at adref. Mae hynny’n swnio’n syml. Yn ymarferol, gall fod yn rhyfeddol o anodd.

Rwyf wedi profi hyn fy hun wrth chwilio am osodwr lleol. Mae canlyniadau chwilio yn aml yn ffafrio cwmnïau mwy sydd â’r adnoddau i gynnal presenoldeb cryf ar-lein. Gall busnesau llai ddibynnu ar gyfryngau cymdeithasol neu ar lafar, ac mae cadw eu gwybodaeth yn gyfredol yn gorfod cystadlu â gofynion cyflawni’r gwaith.

Gall hynny adael bwlch rhwng y sgiliau sydd gennym yn y rhanbarth a’r sefydliadau sy’n chwilio amdanynt. Wrth i fwy o brosiectau ynni glân gael eu cyflwyno, mae angen i ni wneud y cysylltiadau hynny’n haws.

Yn Uchelgais Gogledd Cymru, mae ein Cronfa Ynni Glân Gogledd Cymru, gwerth £25 miliwn, yn cefnogi cyfleoedd ar draws y sectorau preifat a gwirfoddol. Mae ei nod yn cynnwys lleihau allyriadau carbon a chostau ynni, gan hefyd annog buddsoddiad a chefnogi swyddi. Rydym eisoes yn gweld tua 100 o ymholiadau a mynegiadau o ddiddordeb, gydag ynni solar, system storio ynni batris a gwefru cerbydau trydan ymhlith y technolegau sy’n cael eu hystyried.

I mi, mae yna gyfrifoldeb pwysig gyda’r diddordeb hwnnw. Mae angen i ni helpu sefydliadau i ddatblygu eu prosiectau gan roi cyfle teg i fusnesau sydd wedi’u lleoli yng Ngogledd Cymru i gael eu gweld a’u hystyried ar gyfer y gwaith.

Dyma pam rydym yn sefydlu Cronfa Ddata Cyflenwyr Ynni Adnewyddadwy. Bydd yn darparu cyfeiriadur ar-lein hygyrch i’r cyhoedd o fusnesau sydd wedi’u lleoli yng Ngogledd Cymru, gan helpu sefydliadau i nodi cyflenwyr sydd â’r arbenigedd sydd ei angen ar eu prosiectau. Bydd defnyddwyr yn gallu cyfyngu eu chwiliad yn ôl arbenigedd a sir, gan ei gwneud hi’n haws dod o hyd i fusnesau perthnasol yn lleol.

Mae’r cyfle yn ymestyn y tu hwnt i osodwyr ynni adnewyddadwy. Rydym eisiau clywed gan fusnesau sy’n gweithio ym maes ynni solar, gwynt a dŵr, ochr yn ochr â systemau storio ynni batri, pympiau gwres a seilwaith gwefru cerbydau trydan. Mae lle hefyd i gontractwyr a darparwyr gwasanaeth y mae eu gwaith yn lleihau’r defnydd o ynni mewn adeiladau, gan gynnwys inswleiddio a gwelliannau eraill i ffabrig adeilad.

Nid oes angen i fusnes fod yn fawr i gyfrannu. Mae gennym ddiddordeb yn yr hyn y gellir ei ddarparu, y gwasanaethau y mae’n eu cynnig a’r achrediadau perthnasol sydd ganddo. Bydd busnesau sy’n bodloni ein gofynion yn gallu cyflwyno’r wybodaeth honno mewn cyfeiriadur sydd wedi’i gynllunio i helpu darpar gwsmeriaid i ddod o hyd iddynt.

Nid yw’r gronfa ddata yn fframwaith caffael nac yn gynllun achredu. Nid yw cynhwysiant yn gwarantu gwaith, penodiad na chymeradwyaeth gan Uchelgais Gogledd Cymru. Mae’n rhoi mwy o welededd i gyflenwyr ac yn helpu sefydliadau i adnabod busnesau y byddent efallai yn dymuno cysylltu â hwy.

Ar ôl ei sefydlu, rydym yn bwriadu rhannu’r cyfeiriadur gyda sefydliadau sy’n ymholi am y Gronfa Ynni Glân. Gall y cysylltiad hefyd weithio i’r cyfeiriad arall. Efallai y bydd cyflenwr sy’n siarad â chwsmer am osodiad yn gweld bod cyllid yn rhwystr. Yn y sefyllfa honno, gall annog y cwsmer i archwilio a allai’r gronfa gefnogi prosiect cymwys.

Rydym yn gweithio gyda ⁠GwerthwchiGymru i annog busnesau perthnasol i ymuno. Mae dau weminar yn cael eu cynllunio, ochr yn ochr â digwyddiad cwrdd â’r prynwr ar gyfer y Flwyddyn Newydd. Rydym hefyd eisiau helpu busnesau llai i ddod yn fwy cyfforddus yn defnyddio llwyfannau fel GwerthwchiGymru, fel bod dod o hyd i gyfleoedd ac ymateb iddynt yn teimlo’n fwy hylaw.

Mae pwrpas economaidd ehangach y tu ôl i’r gwaith hwn. Mae helpu cyflenwyr lleol i gael mynediad at brosiectau yn rhoi cyfleoedd iddynt dyfu a gallant helpu i gadw mwy o werth buddsoddiad ynni glân yng Ngogledd Cymru. I’r sefydliadau sy’n buddsoddi, mae mynediad at arbenigedd addas yn rhan ymarferol o droi syniad yn brosiect wedi’i gyflawni.

Mae busnesau eisoes yn ymuno â’r gronfa ddata. Fy anogaeth i eraill yw cymryd rhan yn awr, fel y gall eu harbenigedd fod yn weladwy wrth i brosiectau ddatblygu.

Gall busnesau ddarganfod mwy drwy’r hysbysiad Cronfa Ddata Cyflenwyr Ynni Adnewyddadwy ar ⁠GwerthwchiGymru neu drwy e-bostio ynni@uchelgaisgogledd.cymru.