Mae sefydliad sy’n brwydro dros hawliau pobl anabl yng Nghymru yn cefnogi ymgyrch gan Lywodraeth Cymru i godi ymwybyddiaeth o’r ystod eang o gymorth recriwtio a hyfforddiant sydd ar gael i fusnesau i’w helpu i ddod dros effaith y pandemig COVID-19.

Mae Anabledd Cymru yn ceisio sicrhau hawliau, cydraddoldeb a’r gallu i fyw yn annibynnol i bobl anabl yng Nghymru. Mae’n sefydliad Cymru gyfan, gyda thîm o wyth yn gweithio o’r swyddfa yng Nghaerffili, ac mae wedi gweld y cynllun GoWales yn ffordd ddelfrydol o ddod a sgiliau a phrofiad newydd i’w dîm.

Meddai Jody Mellir, swyddog rhaglen Anabledd Cymru: “Yn ystod y tri mis diwethaf, rydym wedi croesawu 11 myfyriwr o wahanol brifysgolion yng Nghymru drwy GoWales. Fel sefydliad pobl anabl, roedden ni am greu rhagor o gyfleoedd i bobl anabl yng Nghymru gael profiad gwaith, ac am gynnig lleoliadau i fyfyrwyr anabl yn benodol. Mae tua 75% o’r rhai rydyn ni wedi’u croesawu wedi bod yn fyfyrwyr anabl, a dros y blynyddoedd rydyn ni wedi cynnig lleoliadau i ystod eang o fyfyrwyr o wahanol gefndiroedd gyda diddordebau a sgiliau amrywiol.”

Trwy GoWales, mae busnesau yn gweithio’n agos gyda chynghorwyr i lunio lleoliadau profiad gwaith o ansawdd ar gyfer myfyrwyr prifysgol sydd hefyd o fudd i’w busnes. Mae myfyrwyr yn cael eu paratoi ar gyfer gwaith cyn y lleoliad ac mae’r rhaglen yn talu eu holl dreuliau.

Gall busnesau fanteisio ar GoWales a chymorth hyfforddiant a recriwtio arall a gyllidir gan Lywodraeth Cymru i’w helpu i dyfu a buddsoddi yn eu gweithlu drwy’r Porth Sgiliau. Mae Llywodraeth Cymru wedi lansio’r ymgyrch ‘Yn Gefn i Chi’ i sicrhau bod busnesau yng Nghymru’n ymwybodol o’r cymorth sydd ar gael iddyn nhw fel y gallan nhw fanteisio ar y rhaglen sy’n iawn ar gyfer eu hanghenion nhw.

Aeth Jody ymlaen:

“Mae GoWales wedi bod yn ffordd wych o ddenu gwahanol sgiliau i’n tîm na fyddai wedi bod yn bosibl fel arall. Roedden ni’n gallu denu siaradwyr Cymraeg pan nad oedd rhai’n gweithio gyda ni. Rydyn ni wedi cael myfyrwyr yn astudio pob dim o ddadansoddi data a phynciau STEM yr holl ffordd i bynciau creadigol fel cyfathrebu a darlunio yn ymuno â’n tîm am gyfnodau amrywiol.  Rydyn ni’n dal i ddefnyddio darluniau un myfyriwr i’n helpu i ledaenu ein neges i bobl anabl ac rydyn ni wedi dal ati i weithio gyda rhan o’r myfyrwyr hynny fel ymgynghorwyr, gweithwyr a gwirfoddolwyr.

“Rydyn ni’n gweithio’n agos gyda chynghorwyr GoWales ym mhob un o’r prifysgolion i ddatblygu cynllun gwaith ar gyfer lleoliad pob myfyriwr sy’n cyd-fynd â’u diddordebau a’r hyn maen nhw am ei gael o’r profiad, yn ogystal â’n hanghenion. Mae’r cynghorydd yn helpu i drefnu’r lleoliad, yn paratoi pob myfyriwr i ymuno â’r gweithle ac mae’r rhaglen yn talu costau’r myfyrwyr. Mae hynny’n tynnu’r pwysau oddi arnom ni, er mwyn i ni allu canolbwyntio ar y lleoliad ei hun a sicrhau bod y myfyriwr ac Anabledd Cymru fel sefydliad yn manteisio i’r eithaf ar eu hamser gyda ni.

“Mae’r lleoliadau yn hyblyg iawn, sy’n hollbwysig i’n myfyrwyr anabl a fydd o bosib â namau a fydd yn golygu ei bod yn anoddach iddyn nhw ymrwymo i weithio am ddiwrnod llawn neu wythnos lawn mewn ambell achos. Oherwydd yr hyblygrwydd  hwnnw hefyd, bu’n haws i ni symud lleoliadau ar-lein pan ddechreuodd ein tîm weithio’n rhithwir ar ddechrau’r pandemig.

“Rydyn ni wedi cael llawer o lwyddiant gyda GoWales a byddem yn sicr yn annog busnesau eraill i ystyried a allai’r rhaglen hon, neu unrhyw raglenni eraill sydd ar gael gan Lywodraeth Cymru, fod yn opsiwn iddyn nhw.”

Er mwyn cefnogi adferiad economi Cymru ar ôl COVID-19, mae Llywodraeth Cymru yn buddsoddi mewn swyddi a hyfforddiant i helpu busnesau i oroesi a thyfu, ac er mwyn diwallu anghenion tirwedd economaidd newidiol Cymru.

Meddai Ken Skates, Gweinidog yr Economi, Trafnidiaeth a Gogledd Cymru:

“Y 12 mis diwethaf yw’r cyfnod anoddaf i lawer ohonom ei wynebu erioed. Mae’n hollbwysig bod busnesau yn gwybod bod Llywodraeth Cymru yn gefn iddyn nhw, a bod cymorth ar gael i’r rhai sydd ei angen.

“Ein pecyn cymorth busnes yw’r pecyn cymorth mwyaf haelionus yn y DU. Mae wedi golygu bod mwy na £2 biliwn ar gael i fusnesau ledled Cymru, gan ddiogelu miloedd o gwmnïau a llawer mwy o swyddi.

“Rydyn ni hefyd yn buddsoddi £40 miliwn yn ein Hymrwymiad Covid i ddarparu hyfforddiant am ddim a gyda chymhorthdal, grantiau i alluogi busnesau i ddenu doniau a sgiliau newydd, a chyngor arbenigol gan gynghorwyr Busnes Cymru a all argymell cymorth recriwtio a hyfforddiant wedi’i deilwra ar gyfer anghenion busnes unigol. Mae hyn wedi bod yn hanfodol wrth gymell cyflogwyr i recriwtio a chadw 5,000 o brentisiaid.

“Wrth i ni ddal ati i lywio drwy’r amseroedd anodd ac ansicr hyn, byddwn yn gwneud popeth o fewn ein gallu i gefnogi busnesau a gweithwyr Cymru. Mae hyn yn cynnwys cynllunio ar gyfer yr hyn a ddaw nesaf. Rwyf wedi lansio’r Genhadaeth i Gryfhau ac Ailadeiladu’r Economi newydd sy’n cynnig gobaith go iawn ar gyfer y dyfodol a bydd yn helpu ein pobl, ein busnesau a’n cymunedau i lwyddo a ffynnu dan amgylchiadau anodd dros ben.

“Rwy’n gwybod y gallwn lwyddo i feithrin economi lewyrchus a theg a dyfodol sy’n gweithio’n well i bawb.”

Am ragor o wybodaeth ar y cymorth sydd ar gael drwy’r Porth Sgiliau, ewch i busnescymru.llyw.cymru/porthsgiliau neu ffoniwch 03000 6 03000 i siarad gyda chynghorydd Busnes Cymru.