Cynhelir Ffair Swyddi am ddim yn y Rhyl ar 27 Medi ym Mwyty a Bar 1891 er mwyn arddangos amrywiaeth eang o gyfleoedd i weithio sydd ar gael yn lleol ac yn genedlaethol.

Bydd mwy na 40 o gyflogwyr yn arddangos yn y lleoliad glan môr, a’r rheiny’n sefydliadau lleol a chenedlaethol.

Mae’r Ffair Swyddi’r hydref ddiweddaraf hon yn dilyn tair sydd eisoes wedi’u cynnal eleni, gydag un yn y Rhyl fis Ionawr, un yn Llangollen ym mis Mawrth a’r mwyaf diweddar yn Rhuthun ar ddiwedd mis Mehefin.

Cafwyd dros 250 o fynychwyr drwy ddrysau Bwyty a Bar 1891 yn Theatr y Pafiliwn ar gyfer y ffair ddiwethaf yn y Rhyl, y nifer uchaf hyd yma.

Trefnir y digwyddiad gan Dîm Sir Ddinbych yn Gweithio Cyngor Sir Ddinbych, a bydd yn rhedeg o 10am tan 4pm, gan alluogi i drigolion y Rhyl a thu hwnt ddod i ddarganfod dros 50 o gyfleoedd cyflogaeth sydd ar gael gan amrywiaeth o fusnesau a diwydiannau. Mae rhai o’r cyflogwyr fydd yn mynychu yn cynnwys enwau adnabyddus cenedlaethol fel Heddlu Gogledd Cymru, Y Lluoedd Arfog, Wynne Construction a Clwyd Alyn.

Nod gwasanaeth Sir Ddinbych yn Gweithio Cyngor Sir Ddinbych yw cydlynu’r math o gymorth sy’n helpu pobl i gael gwaith drwy chwalu rhwystrau. Gan weithio gyda busnesau a sefydliadau lleol, mae rhaglen Sir Ddinbych yn Gweithio wedi ymrwymo i gefnogi pobl sy’n byw yn Sir Ddinbych i gael gwaith a/neu i uwchsgilio gyda hyfforddiant am ddim.

Dywedodd Rees Brown, Rheolwr Perthnasoedd Cyflogwyr a Hyfforddiant yn Sir Ddinbych yn Gweithio:

“Rydym yn falch iawn o weld Ffair Swyddi Sir Ddinbych yn Gweithio yn dychwelyd i’r Rhyl, gan ein bod wedi gweld nifer o lwyddiannau yn sgil y digwyddiad hwn, gan gynnwys cyflogwyr yn dod o hyd i ymgeiswyr a phreswylwyr yn dod o hyd i waith.

“Mae gennym amrywiaeth eang o gyflogwyr cenedlaethol a lleol sy’n chwilio am ymgeiswyr ar gyfer amrywiaeth o swyddi, felly byddwn yn annog unrhyw un yn Sir Ddinbych sy’n chwilio am gyfle newydd am waith i ddod i’r digwyddiad hwn a chanfod pa gyfleoedd cyflogaeth sydd ar gael iddyn nhw.”

Meddai’r Cynghorydd Jason McLellan, Arweinydd y Cyngor ac Aelod Arweiniol Twf Economaidd a Threchu Amddifadedd:

“Yn dilyn y tair ffair swyddi a gynhaliwyd eisoes eleni, rydym yn gobeithio y bydd y ffair ddiweddaraf hon yn y Rhyl yn dilyn yr un duedd a’r un diwethaf a gynhaliwyd yno, lle cafwyd y nifer uchaf erioed o bobl.

“Mae ffeiriau swyddi yn ffordd wych i bobl ehangu eu gorwelion a dod i ddarganfod amrywiaeth eang o gyfleoedd cyflogaeth.

“Mae nifer o fusnesau adnabyddus wedi trefnu i fynychu’r digwyddiad hwn, felly byddwn i’n annog unrhyw un sy’n chwilio am waith, neu sydd eisiau newid gyrfa, i ddod draw.”

Er mwyn cael y wybodaeth ddiweddaraf am ddigwyddiadau ac i ddysgu mwy am Sir Ddinbych yn Gweithio, ewch i https://www.denbighshire.gov.uk/cy/swyddi-a-gweithwyr/sir-ddinbych-yn-gweithio/sir-ddinbych-yn-gweithio.aspx neu i gael cefnogaeth cyflogaeth, https://working.denbighshire.gov.uk/

Ariennir Sir Ddinbych yn Gweithio yn rhannol drwy Raglen Cymunedau am Waith a Mwy Llywodraeth Cymru, sy’n cefnogi’r rhai sydd dan yr anfantais fwyaf yn y farchnad lafur i oresgyn y rhwystrau sy’n eu hatal rhag cael gwaith.

Mae Sir Ddinbych yn Gweithio wedi derbyn £3,529,632 gan Lywodraeth y DU drwy Gronfa Ffyniant Gyffredin y DU.