Pennaeth talent a chynwysoldeb Dŵr Cymru, Annette Mason, sy’n dweud wrth BNW pam mae’r cwmni’n hyrwyddo prentisiaid a sut gall prentisiaethau fod o fudd i bob busnes. 

Yn Dŵr Cymru, mae ein Rhaglen Prentisiaeth yn eithriadol o bwysig i ni. Rydyn ni’n recriwtio prentisiaid oherwydd eu bod yn caniatáu i’r busnes dyfu ei dalent ei hun, gan sicrhau ein bod yn datblygu gweithwyr sy’n llawn cymhelliant, yn fedrus ac yn awyddus i ddysgu a datblygu.

Mae gennym amrywiaeth eang o brentisiaethau ar gael ar draws gwahanol feysydd a setiau sgiliau, gyda llawer o’n rolau rheng flaen a’n rolau sy’n wynebu’r cwsmer yn cael eu cyflwyno neu eu datblygu drwy brentisiaethau. Rydyn ni’n recriwtio tua 30 o brentisiaid bob blwyddyn – rhai sy’n dechrau yn 16 oed, cyn gynted ag y byddant yn gadael yr ysgol, yn ogystal â rhai sydd wedi astudio mewn addysg bellach. Gall y garfan olaf fod wedi gwneud cymwysterau Safon Uwch a byddant yn dod atom ni ar brentisiaeth uwch, neu maen nhw’n bobl sydd eisiau newid eu gyrfa yn nes ymlaen yn eu bywyd.

Rydyn ni hefyd yn defnyddio prentisiaethau i uwchsgilio rhai o’n gweithwyr presennol gyda’n rhaglenni, gan ddefnyddio prentisiaethau lefel gradd.

Un o’r prif fanteision i ni yw bod prentisiaid yn ein helpu i adeiladu gweithlu ffyddlon ac ymroddedig sy’n helpu i hybu cynhyrchiant. Gallwn deilwra recriwtiaid i fod yn addas ar gyfer swyddi penodol ac oherwydd bod prentisiaethau’n hyblyg, maent yn diwallu anghenion ein busnes. Gallwn ddatblygu gweithwyr newydd sy’n ifanc, yn uchelgeisiol, yn awyddus i ddysgu ac sydd heb ddatblygu arferion gwael yn sgil gweithio rywle arall. Fodd bynnag, rydyn ni bob amser yn awyddus i’n prentisiaid gael cyfle i gymryd rhan yn y busnes ehangach, er mwyn iddynt allu cael darlun llawn o’r sefydliad a gwneud eu penderfyniadau eu hunain am eu llwybrau a’r sgiliau yr hoffent eu datblygu. Rydyn ni wedi gweld y bydd prentisiaid yn datblygu eu gyrfa o’r diwrnod cyntaf a bod yr wybodaeth lefel mynediad a’r sgiliau craidd maen nhw’n eu dysgu yn aros gyda nhw wrth iddyn nhw symud drwy’r busnes.

Rydyn ni’n ffodus iawn bod gennym ni, Dŵr Cymru, gydweithwyr sydd wedi bod yn y busnes ers 30 neu 40 o flynyddoedd – mae’n bwysig iawn i ni ein bod yn cadw talent. Ond, mae denu talent ifanc hefyd yn bwysig gan eu bod yn cynnig syniadau newydd a safbwyntiau ffres i’r gweithle.

Mae prentisiaethau hefyd yn helpu i wella’r amrywiaeth o sgiliau mewn sefydliad gan ei fod yn annog busnesau i edrych ar y ffordd y maent yn gwneud pethau. Mae prentisiaid yn gweithio gyda phobl sy’n fwy profiadol, er mwyn dysgu – ond gall eu presenoldeb wneud i feysydd busnes edrych yn fanylach ar yr hyn y maent yn ei wneud – a gall hynny arwain at welliannau a mwy o effeithlonrwydd.

Ffordd arall o sicrhau bod prentisiaethau’n ychwanegu gwerth at y sefydliad yw hyfforddiant yn y gwaith. Mae’r hyfforddiant yn werthfawr i’r prentis, ond mae hefyd yn werthfawr i’r busnes gan ein bod yn gweithio gyda’n gilydd o’r dechrau, ac yn cefnogi ein gilydd drwy rannu profiadau, heriau a chyfleoedd.

Mae meithrin eich talent eich hun hefyd yn galluogi gweithwyr sydd eisoes yn y busnes i ddatblygu pobl newydd, sy’n gymhelliant mawr iddyn nhw hefyd.

Mae tâl Ardoll Dŵr Cymru bob blwyddyn yn cael ei ddefnyddio ar gyfer y Rhaglen Prentisiaethau. Fel cwmni cyflog byw achrededig, rydyn ni’n talu’r cyflog byw i bob prentis, ac yn credu bod hyn yn cyfrannu at lwyddiant y rhaglen. Mae gweithwyr yn cael eu gwerthfawrogi ac yn cael eu paratoi i lwyddo, sy’n sicrhau canlyniadau hirdymor a pharhaus i’n busnes.

Ar ôl i brentisiaid gael eu hyfforddi a’u cymhwyso’n llawn, maent yn sicr o gael gwaith llawn amser gyda Dŵr Cymru. Pan fyddant yn pasio’r cymhwyster, mae ganddyn nhw’n swydd honno. Mae hyn yn cefnogi ein gwaith o gynllunio’r gweithlu a’r llif o dalent. Mae’n fuddsoddiad hirdymor effeithiol gan ei fod yn creu gweithwyr ffyddlon, gan gynyddu cyfraddau cadw staff.

I gael gwybod mwy am brentisiaethau, ewch i Busnes Cymru.