Mae cwmni gwasanaethau eiddo yng Nghaerdydd yn cefnogi ymgyrch gan Lywodraeth Cymru i godi ymwybyddiaeth o’r ystod eang o gymorth recriwtio a hyfforddiant sydd ar gael i fusnesau i’w helpu i ddod dros effaith y pandemig COVID-19.

Ian Williams yw cwmni gwasanaethau eiddo mwyaf y DU, gyda’i safleoedd yng Nghymru yng Nghaerdydd a Wrecsam, ac mae’n gweithio ledled y wlad yn adnewyddu a gwella cartrefi a busnesau. Mae rhaglen brentisiaethau Llywodraeth Cymru, a ddarperir drwy hyfforddiant CITB, wedi dod yn rhan greiddiol o gynllun recriwtio a thwf hirdymor y sefydliad.

Meddai Jo Down, swyddog academi Ian Williams:

“Mae gennym ni brentisiaid yn gweithio ledled ein holl brif adrannau. O swyddi paentio ac addurno i weinyddu a rheoli ymateb ac asedau, mae ein prentisiaid yn derbyn hyfforddiant ar draws pob isadran er mwyn sicrhau twf a hirhoedledd drwyddi draw.”

Mae busnesau o bob maint a ledled pob sector yn gymwys i gymryd rhan yn Rhaglen Prentisiaethau Cymru. Mae Llywodraeth Cymru yn cynnig llwybrau prentisiaeth a gyllidir yn llawn mewn 23 sector sydd ar gael ar bedair lefel i ddiwallu anghenion busnesau unigol. Mae’r sgiliau a’r hyfforddiant a ddarperir ar y llwybrau hyn wedi’u teilwra i fod yn addas ar gyfer pob gweithle a’i ofynion.

Gall busnesau fanteisio ar brentisiaethau a chymorth hyfforddiant a recriwtio arall a gyllidir gan Lywodraeth Cymru i’w helpu i dyfu a buddsoddi yn eu gweithlu drwy’r Porth Sgiliau. Mae Llywodraeth Cymru wedi lansio’r ymgyrch ‘Yn Gefn i Chi’ i sicrhau bod busnesau yng Nghymru’n ymwybodol o’r cymorth sydd ar gael iddyn nhw fel y gallan nhw fanteisio ar y rhaglen sy’n iawn ar gyfer eu hanghenion nhw.

Ers dechrau’r argyfwng COVID-19, mae Ian Williams wedi gweld galw a thwf cynyddol. Yn sgil hynny, mae’r cwmni wedi rhoi cyfle i 19 prentis pellach i gefnogi ei dimau prysur.

Aeth Jo ymlaen:

“Rydyn ni wedi bod yn lwcus i gadw’n brysur gydol y pandemig, sydd wedi golygu ein bod wedi bod yn y sefyllfa ffodus i allu dal ati i roi cyfleoedd i brentisiaid. Maen nhw mor bwysig i’n busnes yn yr hirdymor, ac yn y tymor byr roedd ein timau’n ddiolchgar iawn am yr help llaw ychwanegol, felly roedd hi’n gwneud synnwyr i ni ddal ati i weithio gyda nhw - yn enwedig gyda’r cyllid sydd ar gael drwy’r cynllun prentisiaethau.”

“Mae ein prentisiaid wedi gwneud cymaint o argraff arnom ni ers ymuno fel ein bod ni wedi cynnig enwau rhai ar gyfer gwobrau cenedlaethol. Mae’r doniau newydd a’u gallu i addasu i dechnolegau newydd a’u deall yn wyneb gweithlu sy’n heneiddio wedi bod yn amhrisiadwy. Trwy ein prentisiaethau, mae ein gweithwyr sydd wedi bod yma ers amser maith wedi gallu trosglwyddo oes o sgiliau a gwybodaeth iddynt er mwyn sicrhau bod y diwydiant yn parhau i ffynnu ymhell wedi iddyn nhw ymddeol.”

Er mwyn cefnogi adferiad economi Cymru ar ôl COVID-19, mae Llywodraeth Cymru yn buddsoddi mewn swyddi a hyfforddiant i helpu busnesau i oroesi a thyfu, ac er mwyn diwallu anghenion tirwedd economaidd newidiol Cymru.

Meddai Ken Skates, Gweinidog yr Economi, Trafnidiaeth a Gogledd Cymru:

“Y 12 mis diwethaf yw’r cyfnod anoddaf i lawer ohonom ei wynebu erioed. Mae’n hollbwysig bod busnesau yn gwybod bod Llywodraeth Cymru yn gefn iddyn nhw, a bod cymorth ar gael i’r rhai sydd ei angen.

“Ein pecyn cymorth busnes yw’r pecyn cymorth mwyaf haelionus yn y DU. Mae wedi golygu bod mwy na £2 biliwn ar gael i fusnesau ledled Cymru, gan ddiogelu miloedd o gwmnïau a llawer mwy o swyddi.

“Rydyn ni hefyd yn buddsoddi £40 miliwn yn ein Hymrwymiad Covid i ddarparu hyfforddiant am ddim a gyda chymhorthdal, grantiau i alluogi busnesau i ddenu doniau a sgiliau newydd, a chyngor arbenigol gan gynghorwyr Busnes Cymru a all argymell cymorth recriwtio a hyfforddiant wedi’i deilwra ar gyfer anghenion busnes unigol. Mae hyn wedi bod yn hanfodol wrth gymell cyflogwyr i recriwtio a chadw 5,000 o brentisiaid.

“Wrth i ni ddal ati i lywio drwy’r amseroedd anodd ac ansicr hyn, byddwn yn gwneud popeth o fewn ein gallu i gefnogi busnesau a gweithwyr Cymru. Mae hyn yn cynnwys cynllunio ar gyfer yr hyn a ddaw nesaf. Rwyf wedi lansio’r Genhadaeth i Gryfhau ac Ailadeiladu’r Economi newydd sy’n cynnig gobaith go iawn ar gyfer y dyfodol a bydd yn helpu ein pobl, ein busnesau a’n cymunedau i lwyddo a ffynnu dan amgylchiadau anodd dros ben.

“Rwy’n gwybod y gallwn lwyddo i feithrin economi lewyrchus a theg a dyfodol sy’n gweithio’n well i bawb.”

Am ragor o wybodaeth ar y cymorth sydd ar gael drwy’r Porth Sgiliau, ewch i busnescymru.llyw.cymru/porthsgiliau neu ffoniwch 03000 6 03000 i siarad gyda chynghorydd Busnes Cymru.