Mae un o gyflogwyr gweithgynhyrchu mwyaf Cymru yn cefnogi ymgyrch gan Lywodraeth Cymru i godi ymwybyddiaeth o’r ystod eang o gymorth recriwtio a hyfforddiant sydd ar gael i fusnesau i’w helpu i ddod dros effaith y pandemig COVID-19.

Mae Tata Steel yn cefnogi dros 6,300 o bobl ledled Cymru. Mae’r sefydliad yn ymfalchïo ei fod yn rhoi cyfleoedd i staff ddysgu sgiliau ac ennill cymwysterau newydd. Mae cyllid a chymorth Llywodraeth Cymru wedi gwneud cyfraniad hanfodol at dwf a datblygiad gweithlu Tata Steel yng Nghymru - o brentisiaethau ar lefel derbyn i hyfforddiant iechyd a diogelwch achrededig ar gyfer aelodau staff sefydledig.

Meddai Marc Harwood, rheolwr gallu yn Tata Steel:

“Mae hyfforddi ein gweithlu yn bwysig dros ben i ni. Mae’r byd busnes yn esblygu drwy’r amser, ac mae hyfforddi ein staff i’r lefel briodol yn dechrau o ddyddiau cynnar eu gyrfaoedd hyd ddiwedd eu gyrfaoedd. Mae hyn yn sicrhau ein bod yn gallu dal i fyny gyda’r datblygiadau sector diweddaraf - dechreuodd cyfran fawr o’n gweithwyr gyda ni fel prentisiaid yn dysgu wrth iddynt fagu profiad yn y gwaith gyda ni - ac mae hyn yn parhau gydol eu hamser gyda Tata Steel.”

Profwyd bod buddsoddi mewn hyfforddiant staff yn hwb i ymgysylltu â gweithwyr ac yn gwella eu lles yn gyffredinol. Mae Llywodraeth Cymru yn cynnig ystod eang o gymorth i helpu busnesau i fuddsoddi yn hyfforddiant eu gweithlu, fel eu bod yn dysgu’r sgiliau sydd eu hangen arnyn nhw i dyfu a ffynnu.

O brentisiaethau a Chyfrifon Dysgu Personol i Gronfa Dysgu Undeb Cymru, gall busnesau gael mynediad at y cymorth hwn a chymorth hyfforddiant a recriwtio arall a gyllidir gan Lywodraeth Cymru i’w helpu i dyfu a buddsoddi yn eu gweithlu drwy’r Porth Sgiliau. Mae Llywodraeth Cymru wedi lansio’r ymgyrch ‘Yn Gefn i Chi’ i sicrhau bod busnesau yng Nghymru’n ymwybodol o’r cymorth sydd ar gael iddyn nhw fel y gallan nhw fanteisio ar y rhaglen sy’n iawn ar gyfer eu hanghenion nhw.

Aeth Marc yn ei flaen:

“Ar hyn o bryd rydyn ni’n cyflogi 270 prentis ledled Cymru. Mae prentisiaid yn hynod o bwysig i’n busnes. Nhw sydd wrth wraidd ein sefydliad gyda’r potensial i fod yn arweinwyr y dyfodol - mae rhai o’n huwch staff, gan gynnwys cyfarwyddwyr ddoe a heddiw wedi dechrau arni fel rhan o’n rhaglenni prentis a graddedigion. Maen nhw’n treulio eu hamser rhwng astudiaethau academaidd a dysgu wrth wneud y swydd yn y gweithle. Mae profiad ymarferol fel hyn mor werthfawr i ddiwydiant fel ein un ni, ac yn un na allwch chi ei ddysgu mewn gwerslyfr.

“Yn ogystal â denu doniau newydd, mae prentisiaethau yn ffordd wych o hyfforddi a datblygu ein gweithlu presennol. Ar hyn o bryd, mae gennym 207 o gydweithwyr wedi ymrestru ar raglenni prentisiaethau amrywiol y maen nhw’n eu dilyn ochr yn ochr â’u gwaith arferol. Mae’n bwysig i ni ein bod yn meithrin ein doniau ac yn cyflogi pobl leol. Dyw’r sgiliau craidd sydd eu hangen arnom ni ddim wastad ar gael yn yr ardal leol, felly trwy roi’r cyfle i weithwyr ddatblygu a diweddaru eu sgiliau gallwn gynyddu ein cyflenwad o ddoniau tra’n rhoi rhywbeth yn ôl i’r gymuned o’n cwmpas sy’n hollbwysig i lwyddiant ein busnes.

“Yn ddiweddar rydyn ni wedi dechrau pwyso a mesur llwybrau hyfforddiant a datblygu eraill. Mae ein cynrychiolwyr undeb wedi dod o hyd i hyfforddiant iechyd a diogelwch ar-lein sydd ar gael am bris rhatach drwy Gronfa Ddysgu Undeb Cymru felly rydyn ni wrthi’n rhoi ambell un drwy’r cwrs fel cyfnod peilot. Mae gan hyfforddiant fel hyn fudd uniongyrchol i bawb sy’n gweithio ar y llawr gwaith a bydd pawb sy’n cwblhau’r hyfforddiant yn derbyn hyfforddiant achrededig sy’n cynnig lefel ychwanegol o sicrwydd ynghyd â bod yn bluen yn eu het.

“Rydyn ni hefyd mewn trafodaethau gyda’n colegau lleol am ddatblygu rhai cyrsiau a allai fod ar gael drwy Gyfrifon Dysgu Personol. Mae’n ddyddiau cynnar, ond mae’n rhywbeth y credwn a allai gael effaith bositif arall. Mewn diwydiant fel ein un ni mae hyfforddiant gorfodol penodol y mae’n rhaid ei gwblhau bob blwyddyn sy’n defnyddio cyfran o’n cyllideb hyfforddiant. Bydd Cyfrifon Dysgu Personol yn ein galluogi i feddwl am gyrsiau eraill a all fod o fudd i’n cydweithwyr a hefyd yn rhoi’r cyfle i ni nodi pa feysydd yr hoffen ni iddyn nhw eu datblygu – meysydd na fydden nhw o bosib wedi cael y cyfle i ymroi iddyn nhw fel arall.

“Mae’r gefnogaeth rydyn ni’n ei derbyn gan Lywodraeth Cymru yn hollbwysig i gynaliadwyedd y diwydiant dur yng Nghymru yn gyffredinol.

Er mwyn cefnogi adferiad economi Cymru ar ôl COVID-19, mae Llywodraeth Cymru yn buddsoddi mewn swyddi a hyfforddiant i helpu busnesau i oroesi a thyfu, ac er mwyn diwallu anghenion tirwedd economaidd newidiol Cymru.

Meddai Ken Skates, Gweinidog yr Economi, Trafnidiaeth a Gogledd Cymru:

“Y 12 mis diwethaf yw’r cyfnod anoddaf i lawer ohonom ei wynebu erioed. Mae’n hollbwysig bod busnesau yn gwybod bod Llywodraeth Cymru yn gefn iddyn nhw, a bod cymorth ar gael i’r rhai sydd ei angen.

“Ein pecyn cymorth busnes yw’r pecyn cymorth mwyaf haelionus yn y DU. Mae wedi golygu bod mwy na £2 biliwn ar gael i fusnesau ledled Cymru, gan ddiogelu miloedd o gwmnïau a llawer mwy o swyddi.

“Rydyn ni hefyd yn buddsoddi £40 miliwn yn ein Hymrwymiad Covid i ddarparu hyfforddiant am ddim a gyda chymhorthdal, grantiau i alluogi busnesau i ddenu doniau a sgiliau newydd, a chyngor arbenigol gan gynghorwyr Busnes Cymru a all argymell cymorth recriwtio a hyfforddiant wedi’i deilwra ar gyfer anghenion busnes unigol. Mae hyn wedi bod yn hanfodol wrth gymell cyflogwyr i recriwtio a chadw 5,000 o brentisiaid.

“Wrth i ni ddal ati i lywio drwy’r amseroedd anodd ac ansicr hyn, byddwn yn gwneud popeth o fewn ein gallu i gefnogi busnesau a gweithwyr Cymru. Mae hyn yn cynnwys cynllunio ar gyfer yr hyn a ddaw nesaf. Rwyf wedi lansio’r Genhadaeth i Gryfhau ac Ailadeiladu’r Economi newydd sy’n cynnig gobaith go iawn ar gyfer y dyfodol a bydd yn helpu ein pobl, ein busnesau a’n cymunedau i lwyddo a ffynnu dan amgylchiadau anodd dros ben.

“Rwy’n gwybod y gallwn lwyddo i feithrin economi lewyrchus a theg a dyfodol sy’n gweithio’n well i bawb.”

Am ragor o wybodaeth ar y cymorth sydd ar gael drwy’r Porth Sgiliau, ewch i busnescymru.llyw.cymru/porthsgiliau neu ffoniwch 03000 6 03000 i siarad gyda chynghorydd Busnes Cymru.