Alwen Williams,

Cyfarwyddwr Portffolio,

Bwrdd Uchelgais Economaidd Gogledd Cymru

Ni fu erioed gyfnod pwysicach i helpu cyflogwyr a gweithwyr i gael y sgiliau sydd eu hangen arnyn nhw yma yng Nghymru. Mae pob rhanbarth a chymuned ar draws y wlad yn wynebu llawer o heriau a chyfleoedd. Yn y byd ar ôl y pandemig, ac ar ôl Brexit, mae’r Porth Sgiliau i Fusnes yma i helpu pawb i baratoi, datblygu ac addasu; nodi a meithrin y sgiliau sydd eu hangen i ffynnu yn yr hyn y mae nifer yn ei alw’n bedwerydd chwyldro diwydiannol.

Haf diwethaf, addawodd Gweinidog yr Economi, Trafnidiaeth a Gogledd Cymru y byddai’n buddsoddi i helpu busnesau i recriwtio a hyfforddi gweithlu cynhwysol – gyda phwyslais penodol ar ganlyniadau gwell i bobl anabl a chreu rhwydwaith o Hyrwyddwyr Cyflogaeth Pobl Anabl. Fe wnaethon ni sgwrsio ag Alwen Williams, Cyfarwyddwr Portffolio Bwrdd Uchelgais Economaidd Gogledd Cymru, i weld sut mae rhaglenni Llywodraeth Cymru’n helpu’r Gogledd i sgilio, uwchsgilio ac ailsgilio, i wireddu potensial pob person a phob menter yn llawn ledled y rhanbarth.

“Mae sgilio gweithwyr yn rhan hollbwysig o’n huchelgais economaidd yma yn y Gogledd”

“Mae sgilio gweithwyr yn rhan hollbwysig o’n huchelgais economaidd yma yn y Gogledd”, meddai Alwen. “Rydyn ni’n rhanbarth amrywiol iawn, gyda llawer o heriau economaidd-gymdeithasol a daearyddol – a phosibiliadau di-ri fwy neu lai i ailgodi’n gryfach a chyflawni hyd yn oed mwy, drwy’r prif brosiectau cyfalaf allweddol a fydd yn creu llawer o gyfleoedd am swyddi, a hefyd y gwaith, cuddiedig yn aml, sydd wedi cychwyn i sicrhau twf cynhwysol yn yr economi sylfaenol sydd wrth wraidd pob cymuned.

“Yr her i bob sefydliad yw nodi’r sgiliau sydd gennych chi a’r sgiliau sydd eu hangen arnoch chi” 

“O ystyried hynny, mae’n galonogol a chyffrous gweld y ddarpariaeth sgiliau a chynghori anhygoel a gyflwynwyd gan y Porth Sgiliau. Mae’r ymgyrch Yn Gefn i Chi mor ysbrydoledig, gan ei bod yn cynnig cyngor a chymorth go iawn a phwrpasol i fusnesau, wedi’u teilwra i’w hunion anghenion ac amgylchiadau. Mae’r dull ‘Paratoi. Datblygu. Addasu’ yn golygu y gall unrhyw sefydliad, yn fawr a bach, mewn unrhyw sector, gryfhau ei weithlu wrth wynebu newid. Dyma’r cyfle i bob sefydliad yn y Gogledd a ledled y wlad i nodi’r sgiliau sydd ganddyn nhw a’r sgiliau sydd eu hangen arnyn nhw - i’w helpu i ddatblygu’r cymwyseddau hynny a’r arbenigedd hwnnw o fewn eu gweithlu cyfredol, neu i roi’r holl gymorth sydd ei angen arnyn nhw iddyn nhw fel y gallan nhw recriwtio staff newydd talentog i’w sefydliad. Dyna beth yw bod yn wydn a diogelu’r dyfodol - ac mae’n rhoi gwir fantais i gyflogwyr a gweithwyr yng Nghymru, mewn byd sy’n newid yn amlwg.”

“Mae hyn yn ymwneud â chynhwysiant economaidd – y cyfle i unrhyw un o unrhyw oedran i ennill sgiliau neu ailsgilio ar gyfer unrhyw swydd”

Mae David Roberts, Cadeirydd Partneriaeth Sgiliau Rhanbarthol Gogledd Cymru, yn ategu’r teimladau hynny: “Yn anad dim, mae’r gwasanaeth hwn yn ymwneud â chynhwysiant economaidd yn y Gogledd, gyda chymorth ymarferol i BBaChau a chwmnïau mawr yn y diwydiannau newydd neu gymharol newydd a’r diwydiannau mwy traddodiadol. Mae’r pandemig wedi’n hatgoffa ni mai’r swyddi sydd byth yn cael y clod yw’r rhai mwyaf hanfodol. Mae’r cyfle hwn i bawb, o unrhyw oedran, i ennill sgiliau ac ailsgilio, ar gyfer unrhyw swydd. Mae’n gyfle i gyflogwyr fanteisio ar botensial a thalent pobl sy’n gadael ysgol neu goleg, y rhai sydd â phrofiad o waith a bywyd sydd wedi colli eu swydd, neu bobl anabl y mae eu cyfraddau cyflogaeth fel arfer yn llawer is na phobl nad ydyn nhw’n anabl.

‘Mae fy neges yn syml: gwnewch yn fawr o’r cymorth hwn’

Mae Alwen yn pwysleisio pa mor bwysig yw hi i bawb fanteisio ar y cyfle a gynigir gan yr ymgyrch hon: “Gall gwasanaethau’r Llywodraeth ymddangos yn bell i’r person ar y stryd neu i fusnes bach sydd wedi’i leoli mewn cornel o ystâd ddiwydiannol, ond mae’r Porth Sgiliau’n ymarferol iawn, yn dda gyda phobl ac yn canolbwyntio ar fusnesau. Mae cynghorwyr arbenigol wrth law i ddeall eich anghenion, eich tywys i’r cyfeiriad cywir a’ch helpu chi i lywio’ch gweithlu fel eich bod yn barod at y dyfodol ac yn gallu cyflawni i’ch llawn botensial. Yn ystod fy amser gyda BT ac Openreach, rwyf wedi gweld â’m llygaid fy hun sut mae hyfforddiant, datblygiad proffesiynol parhaus a chynllunio ar gyfer y dyfodol yn gallu cael effaith anhygoel ar sefydliad, cymuned a Chymru gyfan. Felly neges gadarnhaol sydd gen i i bob cyflogwr, gweithiwr a darpar weithiwr yn y Gogledd: gwnewch yn fawr o’r cymorth hwn, gan ei fod yn gallu helpu i drawsnewid bywydau unigolion, perfformiad busnes, economïau lleol a dyfodol Cymru ei hun.”

Am ragor o wybodaeth am y cymorth sydd ar gael drwy’r Porth Sgiliau, ewch i Yn Gefn i Chi | Porth Sgiliau Busnes Cymru (llyw.cymru) neu ffoniwch 03000 6 03000 i siarad â chynghorydd Busnes Cymru.