Mae gwasanaeth bysiau hyblyg ym Mlaenau Gwent, sy’n ymateb i’r galw, wedi gweld niferoedd y teithwyr yn cynyddu 20% yn ystod y chwe mis diwethaf wrth i bobl ddechrau defnyddio ffyrdd mwy cynaliadwy o deithio.

Mae’r gwasanaeth bysiau Fflecsi, sy’n gweithredu fel gwasanaeth codi a gollwng, wedi cynnal mwy na 23,000 o deithiau ers mis Mehefin, gan gyfuno teithwyr â llwybrau taith tebyg gyda’i gilydd. Mae’n rhaid i deithwyr gadw eu lle drwy’r ap Fflecsi penodol neu alwad ffôn ar gyfradd leol, ac mae’r teithiau’n dechrau yn agos at eu drws ffrynt ac yn mynd â nhw i’r feddygfa neu i’r siopau lleol.

Mae Gary Milburn wedi bod yn yrrwr bysiau am dros 10 mlynedd ac yn ddiweddar ymunodd â thîm Fflecsi fel Rheolwr Dyletswydd.  Ers ymuno, mae wedi gweld poblogrwydd y gwasanaeth yn cynyddu wrth i bobl sylweddoli ei fod yn ddewis cystal â defnyddio’u car.

Dywedodd Gary:

“Ers lansio’r gwasanaeth ym mis Mehefin 2021, rydym wedi gweld cynnydd graddol yn nifer y teithwyr fis ar ôl mis.

“Rwy’n credu, drwy gysylltu teithwyr â gwasanaethau trên a bysiau ehangach, rydym wedi cael gwared ar y rhwystr hwnnw i ddefnyddio trafnidiaeth gyhoeddus fel bod mwy o bobl yn gallu defnyddio’r gwasanaeth – gan helpu pobl i wneud dewisiadau teithio gwahanol.

“Nid ar gyfer cymudwyr yn unig y mae hwn, chwaith – mae gennym blant ysgol, teithwyr yn ystod y dydd, ac oherwydd ein bod yn gweithredu tan 11pm gall pobl ei ddefnyddio i gymdeithasu hefyd.”

Mae’r gwasanaethFflecsi yn gweithredu mewn 11 o leoliadau ledled Cymru ac mae’n un o’r mentrau lawer a gefnogir gan Lywodraeth Cymru mewn ymgais i leihau allyriadau carbon.

Ers ymrwymo i gyrraedd allyriadau sero net erbyn 2050, mae Llywodraeth Cymru wedi bod yn gweithio gyda sefydliadau a busnesau o bob cwr o Gymru i gymryd camau ar newid hinsawdd.

Dywedodd Lee Waters, y Dirprwy Weinidog Newid Hinsawdd, â’r cyfrifoldeb am Drafnidiaeth:

“Gan mai ceir a cherbydau dyletswydd ysgafn sy’n achosi 71% o’r allyriadau o drafnidiaeth yng Nghymru, mae’r ffordd yr ydym yn teithio yn allweddol  i gyrraedd sero net.*

“Mae angen i ni wneud y peth iawn, y peth hawdd ei wneud. Wrth i ni fuddsoddi i wella’r seilwaith i bobl deithio heb geir, mae angen i ni hefyd wneud yn siŵr ei bod yn hawdd i bobl ddefnyddio trafnidiaeth gyhoeddus o’r man lle maen nhw’n byw. Gall gwasanaethau fel Fflecsi helpu i gael gwared ar y rhwystrau i ddefnyddio gwahanol fathau o ddewisiadau trafnidiaeth a lleihau’r angen i ddefnyddio’r car.

“Rhaid i’r 2020au fod yn ddegawd o weithredu. Bydd lleihau allyriadau mwy yn ystod y degawd hwn nag mewn unrhyw gyfnod arall o ddeng mlynedd cyn hyn yn her ac efallai y bydd angen i ni wneud dewisiadau anodd. Os ydym ni i gyrraedd ein targed o fod yn sero net erbyn 2050, mae angen i ni nawr weithio gyda’n gilydd a pharhau i wneud newidiadau i’r ffordd yr ydym ni’n ymddwyn, yn defnyddio ac yn teithio”.

Dywedodd Christian Reed, Pennaeth Masnachol Stagecoach De Cymru:

“Trwy bartneriaeth â Chyngor Bwrdeistref Sirol Blaenau Gwent, Llywodraeth Cymru a Trafnidiaeth Cymru, mae Fflecsi bellach yn achubiaeth i lawer o bobl sy’n teithio yn ardal Blaenau Gwent. Mae teithio ar drafnidiaeth gyhoeddus a gadael y car gartref yn ffordd wych i bobl gymryd camau i daclo newid hinsawdd.

“Rydym yn gwybod bod teithwyr yn aml yn wynebu her yn y filltir gyntaf a’r olaf o’u teithiau, yn aml o ran sut maen nhw’n cyrraedd eu safle bysiau lleol neu’r orsaf drenau. Nod y gwasanaeth Fflecsi yw gwneud y teithiau byr hyn yn bosibl ac yn hygyrch, a chysylltu dewisiadau trafnidiaeth eraill a chynnig mwy ohonynt.”

Trwy gyfuno teithwyr â llwybrau teithiau tebyg gyda’i gilydd mae’n cynnig modd effeithlon o deithio ac mae cynnydd o 17% wedi bod yn niferoedd y teithwyr yn ystod y chwe mis diwethaf. Mae bron i 900 o gyfrifon teithwyr gweithredol, a 90% o’r teithwyr yn defnyddio’r ap i gadw lle ar y bws.

Ariennir Fflecsi gan Gyngor Bwrdeistref Sirol Blaenau Gwent, Trafnidiaeth Cymru a Llywodraeth Cymru, a chaiff ei ddarparu gan Stagecoach. Bwriad y gwasanaeth yw cynnig ffordd fwy cyfleus a dibynadwy o deithio o gwmpas.

Mae cynlluniau treialu Fflecsi eraill gan Lywodraeth Cymru ar waith yn Sir Benfro ac yn Nyffryn Conwy. Mae awdurdodau lleol Rhondda Cynon Taf, Gwynedd, Sir Ddinbych a Sir y Fflint hefyd yn ariannu cynlluniau treialu yn eu hardaloedd. Mae manylion yr holl wasanaethau Fflecsi yma www.fflecsi.wales

I gael rhagor o wybodaeth am brosiectau neu fentrau eraill a gefnogir gan Lywodraeth Cymru ewch i llyw.cymru/gweithreduarhinsawdd