Mae lorïau bin trydan wedi ymuno â nifer cynyddol o fflyd y Cyngor nad ydynt yn defnyddio tanwydd ffosil.

Mae Cyngor Sir Ddinbych wedi derbyn dwy lori Dennis Eagle e-Collect.

Fe ddaw’r cerbydau newydd ar ôl cyfnod prawf yn 2020 gyda lori gasglu Dennis Eagle e-Collect o amgylch Y Rhyl, Prestatyn a Rhuthun gyda staff o’r adran Gwastraff ac Ailgylchu.

Bu i’r Cyngor ddatgan Argyfwng Newid Hinsawdd ac Ecolegol yng Ngorffennaf 2019 ac mae wedi ymrwymo i ddod yn Gyngor Di-garbon Net a mwy Ecolegol Gadarnhaol erbyn 2030.

Rhan o’r gwaith hwn yw cynyddu nifer y cerbydau nad ydynt yn defnyddio tanwydd ffosil a ddefnyddir gan y Cyngor. Mae enghreifftiau o’r cerbydau a ddefnyddir ar hyn o bryd yn cynnwys tacsis, bws mini trydan a ddefnyddir yn ardal Rhuthun, fan arsyllfa symudol ac ATV trydan a ddefnyddir gan staff cefn gwlad, faniau trydan a ddefnyddir i gludo nwyddau gan wahanol wasanaethau a cheir trydan sy’n cefnogi staff y gwasanaethau cymdeithasol.

Mae staff wrthi'n ymgyfarwyddo â’r lorïau newydd a sut y gallant berfformio ar gyfer y gwasanaeth.  Fe fydd y cerbydau’n cael eu defnyddio cyn mis Mawrth.

Dywedodd y Cynghorydd Barry Mellor, Aelod Arweiniol yr Amgylchedd a Chludiant:

“Rydym yn gweithio’n galed i leihau’r milltiroedd a gynhyrchir gan danwydd ffosil yn ein sir gan staff y Cyngor a’r cyhoedd er mwyn mynd i’r afael â newid hinsawdd.

“Fe aeth y cyfnod prawf cychwynnol gyda lori Dennis Eagle e-Collect yn dda iawn, fe ddangosodd i ni fod yna dal fatri ar ôl ar ôl sifft a’i fod yn fwy diogel ac yn fwy cyfforddus i’r staff.

“Yn fwy na dim, mae’r ddau gerbyd yma’n rhan bwysig yn y gadwyn o leihau allyriadau carbon ein fflyd ac rydw i’n edrych ymlaen at eu gweld yn cael eu defnyddio’n fuan.”