Y tri chwmni cyntaf i gyrraedd safle ffatri Crown/Metal Box gynt fydd tri chwmni llwyddiannus sydd yng ngofal dyn busnes o Gastell-nedd. Mae Cyngor Castell-nedd Port Talbot wedi prynu’r safle gyda’r nod o’i drawsnewid yn ganolfan gyflogaeth newydd o bwys.

Bydd yr arbenigwyr fframiau pren, Sevenoaks Modular Ltd, Hale Construction a Hale Homes, sydd i gyd dan law Jonathan Hale o Gastell-nedd, yn adleoli i safle’r hen ffatri ar Heol Milland, lle bu Metal Box am dros 70 mlynedd, a Crown Packaging yn fwy diweddar, nes iddo gau yn 2016.

Bwriad Cyngor Castell-nedd Port Talbot yn awr yw trawsnewid y safle, sydd rhwng Llansawel a Chastell-nedd, gan greu canolfan ar gyfer swyddfeydd, adeiladu a defnyddiau eraill, gyda photensial i greu nifer sylweddol o swyddi.

Mae Sevenoaks a Hale Construction, sydd fel ei gilydd o dan gadeiryddiaeth Mr Hale, a Hale Homes, lle mae Mr Hale yn rheolwr-gyfarwyddwr, wedi caffael rhan sylweddol o safle Crown/Metal Box gynt.

Meddai Jonathan Hale:

“Mae’r diwydiant adeiladu yn symud fwyfwy tuag at ddulliau adeiladu oddi ar y safle, sy’n arbed amser ac arian, ac mae’r safle hwn yn gyfle perffaith i ni ehangu’r dull hwn o weithio ar draws yr holl fusnesau. Rydym ni’n edrych ymlaen at greu llawer mwy o swyddi ansawdd uchel yn y dref a dychwelyd y safle hwn i’w ogoniant blaenorol fel canolbwynt diwydiant yng Nghastell-nedd.”

Dywedodd Charlotte Hale, rheolwr Sevenoaks Modular: “Bydd y safle cyfan yn hunangynhaliol o ran yr ynni y bydd yn ei gynhyrchu ac yn galw amdano – bydd yn astudiaeth achos wych ar gyfer manteision yr economi gylchol. Ein nod yw ailddiffinio’r adeiladau mewn modd cynaliadwy ac adfer y safle mewn modd arloesol, sy’n llesol i’r amgylchedd; rydym am iddo fod yn un o dirnodau’r dref unwaith eto, fel bod y gymuned yn gallu ymfalchïo ynddo, yn ogystal â bod o fudd i’r gadwyn gyflenwi leol a chadw swyddi ac arian yn y rhanbarth.”

Mae safle’r hen ffatri yn rhan o Ganolbwynt Strategol Llywodraeth Cymru ar gyfer Cymoedd Nedd. Bydd rôl allweddol i Gastell-nedd yn y gwaith o gyflawni cynllun Llywodraeth Cymru, Ein Cymoedd Ni, ein Dyfodol Ni, a luniwyd i gau’r bwlch cyflogaeth rhwng Cymoedd De Cymru a gweddill Cymru – gan greu swyddi newydd, cynaliadwy.

Dywedodd y Gweinidog Tai a Llywodraeth Leol, Hannah Blythyn:

“Rwy’n falch o weld bod ein buddsoddiad, drwy’r rhaglen Targedu Buddsoddiad mewn Adfywio, yn chwa o awyr iach i hen adeiladau, a bod hynny’n denu cyflogwyr lleol. Rydym wedi ymrwymo i hybu newid economaidd drwy Dasglu’r Cymoedd – a hwnnw’n newid fydd yn para. Bydd y buddsoddiad hwn yn rhan bwysig o hyn.”

Ar ôl prynu’r safle, a ariannwyd yn rhannol gan grant Buddsoddi mewn Adfywio a Dargedir (TRI) Llywodraeth Cymru, bydd cam cyntaf y gwaith cynhwysfawr i adnewyddu ac ailddatblygu’r safle yn canolbwyntio ar ei drawsnewid yn fuddsoddiad newydd deniadol a fydd yn creu swyddi.

Mae’r Cyngor wrthi ar hyn o bryd yn chwilio am dendrau ar gyfer y gwaith ailddatblygu ac adnewyddu, a fydd hefyd yn cynnwys gwaith adfer angenrheidiol.

Gallai’r safle ddarparu lle ar gyfer hyd at 500 o swyddi, ac yn ogystal â phenderfyniad Sevenoaks i symud i mewn, mae nifer o gwmnïau eraill lleol wedi mynegi diddordeb.

Dywedodd y Cyng. Rob Jones, Arweinydd Cyngor Castell-nedd Port Talbot:

“Rydym wrth ein bodd bod y cwmnïau adnabyddus hyn o grŵp Hale wedi gweld potensial y safle hwn trwy fuddsoddi mewn rhan sylweddol ohono.

“Ein bwriad wrth brynu’r safle yw datblygu lleoliad a fydd nid yn unig yn helpu i ddiogelu dyfodol cwmnïau lleol a chyflogaeth, ond hefyd yn meithrin cyfleoedd ar gyfer twf pellach a chreu swyddi.

“Bydd penderfyniad cwmnïau fel y rhain i adleoli i’r safle yn meithrin hyder, ac yn ein helpu i’w ddatblygu yn ganolfan ar gyfer swyddfeydd, gweithgynhyrchu a defnyddiau eraill a fydd yn helpu i ddatblygu twf ac ehangu, ac yn creu swyddi i Gastell-nedd Port Talbot.”